出色小騎師揚鞭餵飼樣樣掂

開心的暑假快要完結了，一班小蘋果決定要在假期結束前幹一番「大事」──騎上真正的馬匹，並帶領牠們繞場一周，當一個威風八面的小騎師。之後，還替馬匹梳洗身體和餵飼牠們，服侍十分周到。短短一個早上便體驗到真正的騎師生活，也真難能可貴。

記者：餐蛋麵　攝影：大力士
鳴謝：新見馬術中心（27928220）

出發前威風八面
來到馬場當然係要騎馬，但事前工夫都要做妥，就係戴上合規格的頭盔。準備好未？出發啦！

馬上英姿驚險刺激
今次有得畀小蘋果試騎的兩隻馬匹來頭也不小，黑色馬叫「合作愉快」，性格溫馴，白色馬叫「開心人」，已有15歲高齡，是於多年前贏過「遮打盃」的退役賽馬。馬伕哥哥事前叮囑各位小蘋果，不可企在馬匹後面，免生意外！

忻忻一見頭盔同馬鞭，二話不說即刻戴上，好不威風的一副騎師模樣！

見到清理馬匹的梳洗工具，Kelvin即時拎起羽毛刷，唔通佢想幫馬匹扮靚靚至上馬！

馬伕哥哥幫彥丰上馬，屢試屢敗，最後用膠椅作踏腳板才能成功。

「媽咪，我好驚呀！」忻忻上馬唔夠10秒就驚青嗌走。

服侍馬爺齊齊開心
同「開心人」和「合作愉快」散完步後，馬伕哥哥提議幫手餵飼同清理馬匹大爺。小蘋果異口同聲即時答應，好醒目咁一人拎一件清理工具，準備第一時間幫馬匹按摩。

千千年紀輕輕，但已有女騎師風範。一提腳、一上鞍，短短幾分鐘就成功上了「開心人」。

Kelvin一上馬，「合作愉快」竟不停跳跳紮；但佢驚都未驚過，拍拍馬背，抓緊馬鞍昂然向前走。

Kelvin係全場最大膽的小騎師，只有佢肯親手餵飼紅蘿蔔畀「開心人」醫肚。

剛才走圈走咗咁耐，等我哋兩姊弟幫你用按摩刷掃掃背！

同場加映
騎馬當天正值「烈日當空」，不過一班小蘋果騎完馬匹後依然跳跳紮紮，精力旺盛，重加插幾幕自選遊戲，樂而忘返。

彥丰見到馬匹前面的毛髮有點凌亂，就幫佢梳理鬃毛，等佢靚仔啲。

這樣替馬匹沖身，恐怕永遠都不會乾淨，但就難為了馬伕哥哥Kelvin慘遭濕身。

活動詳情
新見馬術中心
地點：西貢大網仔路DD221Lot233
參加辦法：參觀馬匹必須有教練陪同，指導費用每位＄15；試騎馬匹指導費每位$80，必須25人以上。

沙場上有一個用青草搭建而成的瞭望台，個個上晒去，伸個頭出來嚇唬大家！

玩完馬匹，千千見到馬場有兩隻剛出生15日的「大頭狗」，一樣摸不停。