滙豐好似特別多活動同小朋友有關。滙豐噚日同文化博物館合作，搞咗個「我的香港鈔票」設計比賽，畀小朋友設計一張具有香港特色嘅二千五百元鈔票。噚日重頒獎畀三名獲得冠、亞、季軍嘅小朋友，獎品都幾特別，就係一套新滙豐鈔票，編號分別係AB111111、AB222222，同埋AB333333。
講開又講，滙豐銀行中環總行三樓裝修，噚日正式開幕，以新面貌見人。為咗隆重其事，滙豐噚日特別搞咗個開幕儀式，除咗鑼鼓、醒獅和舞龍呢啲傳統儀式外，滙豐重搞咗啲好特別嘅回顧，滙豐準備咗好多歷史照片，製作成為巨大海報，包括有三三年滙豐銀行前身動土儀式、八六年港督尤德主持現時滙豐總行大廈開幕等珍貴圖片。
重有，為咗跟歷史靠近，滙豐重準備咗一幅前總行大型海報，畀在場嘉賓同呢一幢歷史建築物合照。不過，令到在場人士最為興奮嘅事情，係一大班滙豐員工嘅子女，佢哋着咗滙豐由七十年代到𠵱家不同階段嘅男女職員制服。
八方重係年輕，𠵱家至知七十年代嘅滙豐員工制服，唔係紅白間條款式，而係粉藍色全身裙。咁特別，唔怪得嗰個模特兒全日都咁受歡迎，個個爭住同佢哋企巨型海報
