曾經為香港喺世界武術錦標賽攞過冠軍嘅李暉，佢搞嘅「李暉武術文化中心」進駐中環蘇豪區，重喺噚日搞咗個喬遷誌慶典禮。噚日李暉師傅除咗搵夏國璋醒獅隊搞旺個場外，重請咗一大班名人，好似電影老闆Ba叔陳達志、前立法會主席范徐麗泰，同埋一大班藝人嚟撐場㖭。
平時甚少出席呢啲畀面派對嘅鷹君副主席兼董事總經理羅嘉瑞都有嚟！八方問佢點解嚟？羅醫生話，佢其實跟李師傅學咗差唔多成年太極，所以咪嚟捧師傅場囉！佢話𠵱家每日大約會耍半個鐘至九個字太極，學咗一排身體又真係好咗喎！
佢重話其實愈早學太極就愈好，重不停咁叫成日覺得自己作病嘅八方一齊嚟學㖭。
傳真︰2623-9278
電郵︰