煲碟王：
《受難曲》痛愛

宗教片向來並非票房靈丹，列入經典只係寥寥可數，《萬世巨星》入面嘅耶穌載歌載舞，教徒話接受唔到；《基督最後誘惑》重話耶穌係同性戀，簡直叫人眼冤。不過講到爭議性，點都唔及噚日先出三區DVD嘅《受難曲》，全片充滿暴力血腥，搞到美國列為R級片（即三級片）先上得，美國及巴西更有觀眾頂唔順，喺戲院心臟病發暴斃，你話夠唔夠激？

記者：徐影龍　鳴謝：沙田浸信會

《受難曲》英文片名叫Passion，拉丁文解受難。戲院上畫前，先搵嚟一班天主教徒試睇，之後巴閉到邀請埋教宗若望保祿二世觀看，導演米路吉遜重開宗明義，話明全片充滿痛苦與血腥，搞到全球教徒及非教徒都引頸以待，可算未映先轟動。最後全球票房收二億幾美金，排史上最高票房第十位，自掏腰包三千萬嘅米路吉遜，肯定開心到瞓唔着。順帶一提，文中角色譯名跟天主教，而括號內就係基督教嘅譯名，等大家清楚啲知道邊個打邊個。

三千萬重建耶路撒冷
米路吉遜一心想拍番套留傳千古嘅宗教片，為宣揚信仰出一分力。除咗畀錢投資，米還身兼編、導及監製三職。根據《聖經》中嘅四福音：瑪竇（馬太）福音、瑪爾谷（馬可）福音、若望（約翰）福音同路加福音，編寫耶穌被釘十字架前12小時嘅事迹。導演花咗12年時間，研究有關耶穌受難嘅種種細節；之後遠赴意大利歷史城市Matera拍攝、用兩個半月時間喺Cinecitta搭咗個聖城耶路撒冷出嚟，重搵埋語言專家度戲中唔同人所講嘅三種語言，唔搞特技唔搞千軍萬馬冇明星，都要使成三千萬美金。

將痛苦打入心坎
耶穌因自稱默西亞（彌賽亞），即救世主，因而得罪當時得令嘅猶太教，從此受盡壓逼。戲內由頭到尾都充滿極度殘忍嘅刑罰，一次比一次變態兼血腥，耶穌血花灑之不盡。加上被猶達斯（猶太）出賣、被門徒伯多祿（彼得）否認、被子民遺棄等，耶穌喺精神上所受嘅痛苦亦不少，彷彿導演努力將痛苦一下一下咁打入觀眾心坎。雖然官能上夠晒剌激，不過睇嘅人完全冇快感，教徒尚可當係一次信仰上嘅反省，普通人睇完只會覺得唔舒服，覺得耶穌真係好偉大，網上更有人表示若一生只可睇一套戲，必定係《受難曲》！

沙浸梁牧幫你解畫
《受難曲》圍繞耶穌死前12小時嚟拍，戲內眾多角色關係及事件未有交代清楚，好多非教徒睇完滿腹疑團。今日就搵嚟沙田浸信會嘅梁牧師，為《受難曲》解畫，等大家更為投入劇情。

疑問一：
點解羅馬總督夫人，既非信徒，但又努力幫耶穌解圍？
答：根據《聖經》記載，總督夫人歌地亞瞓覺時受到感召，天主話畀佢聽耶穌係義人，要盡力幫佢；自此歌地亞不時會勸諫總督，希望可減低耶穌嘅痛苦。

疑問二：
戲中眾人手持石頭一幕，耶穌從地上扶起一女子事件，好多人睇唔明。
答：《聖經》記載有一班人想留難耶穌，挾持一名跟聖母一樣叫瑪利亞嘅妓女，要耶穌處決。放人，就會犯下《摩西律法》；唔放，就話佢唔夠慈悲。耶穌只係講咗句：「你們誰自認無罪的，就把石頭擲向她吧！」一句話就打發走眾人，解救咗瑪利亞。

疑問三：
耶穌受完鞭刑後，為何瑪利亞用毛巾拭抹地上嘅鮮血？
答：呢幕喺《聖經》上並無記載到，只算係編導嘅「合理推測」，估計主要係想表達聖母對耶穌嘅愛。

疑問四：
點解同場兩名犯人被釘「T」字架，而有別於耶穌被釘嘅十字架？
答：其實三人同樣係被釘十字架，至於點解其中兩人呈「T」字型，純粹係導演嘅意願，可能想突出耶穌都未定。