財務F去十六樓睇完醫生，落樓喺皇后大道中望過對面，好多攝影記者聚集，一時八卦心起，行過馬路去睇吓熱鬧，只見祝賀開張嘅花籃擺到橫巷（新世界大廈與太平行之間）都滿晒，樓梯亦然，而其中有一個花籃下款寫住英皇集團楊受成。因為太多人，太多記者影相，途為之塞，財務F自恃冇人識佢係邊個，企咗一陣，聽見有啲OL行過話：「呢間咪係李麗珍個JackyMa嘅Headquarters囉！」財務F打手機問老婆：「邊個係李麗珍、JackyMa呀？」F太立即叫佢返屋企，唔好勾勾搭搭或者俾人勾搭。
財務F平時只睇報紙A叠加財經版，返屋企睇晒老婆嘅娛樂版、周刊，先至知道Headquarters係乜東東，財務F對老友講：「現在啲髮型屋真巴閉，高級到咁貴都得嘅，幾年前我貪玩，諗住一生人要試一次，去搵咗一個著名Artist（譯，佢哋話最叻嘅叫做artist，其次叫stylist）同我飛髮，搞咗個幾鐘頭之後，埋單要六千幾蚊，嚇咗我一跳，返到屋企，老婆都唔知我飛過髮嚟。一年之後，嗰位artist因愛滋病死咗，我嚇到幾乎有心臟病。我𠵱家年年驗血，驗心臟、照MRI，今次仄一仄，用咗三萬幾蚊，係肉痛㗎，不過求其心安，俾啲名醫鋸都要啦！」
財務F家有恒產，大把水，六千蚊飛個髮，三萬幾驗吓血與心臟，冇研究之至，不過佢覺得啲名醫收咁嘅價錢，態度要和藹友善先至好，髮型屋啲artist、stylist（有一啲叫做creativedirector）摸、按女士個頭，都唔知幾細心呵護，所以啲有錢太太先至俾佢哋摸到上癮，成日幫襯！相反一啲名醫收萬萬聲冇厘耐性，只係佢講，唔准人問，你話啲太太點解唔鍾意artist多過名醫吖。