Twins出道將近四年，歌迷人數一直有增無減，不過成員蔡卓妍（阿Sa）認為她們應不斷轉換形象以保持新鮮感，或許到三十歲的時候，會為組合改過另一個名稱，以切合身份。其實阿Sa事業之所以一帆風順，父母在背後的支持亦十分重要，特別是阿Sa的父親，每次欣賞完女兒的演出後，必定會寫觀後感，十分搞笑。
「要有起跌，唔係會好悶」
女子組合Twins出道以來一直大受歡迎，唱片銷量亦相當不俗，兩人每次出席公開場合，都必定有大批fans支持。近年阿Sa演戲更有不錯的成績，不過事業一帆風順的她，居然希望人生會遇到低潮，而且她一早已有心理準備及周詳的計劃去面對。
阿Sa說：「我一直都好好彩，出道以嚟都好多人錫，好多人幫自己，但係我覺得人生一定要有起有跌，如果唔係就會好悶，同埋我係一個好不甘平凡嘅人，我只係怕喺我跌倒時冇人理我啫。」阿Sa未入娛樂圈之前曾打算到英國繼續升學，到目前為止她仍定期索取入學資料，她認為有一天終能實現這個夢想。阿Sa說：「我有keep住定期攞入學資料，如果呢一行唔需要我，到時咪去讀書囉，我係一個死唔斷氣嘅人，我覺得唔會整得死我，唔做呢行我都有好多嘢可以做，好似做設計啦，寫嘢同投資我都OK㗎，大不了咪去讀書囉，冇話放唔放得低，起碼我都叫做過呀。」
過去不少歌唱組合都逃不過拆夥的命運，阿Sa亦深明「花無百日紅」這個道理，她與鍾欣桐（阿嬌）一直都有考慮這個問題，對此阿Sa表現得十分樂觀，她笑說：「我哋嘅職責就係出嚟entertain大家，每一次我哋都好盡力去做呢樣嘢，如果有一日觀眾真係認為唔需要再有呢兩個女仔，咁我哋都唔會咁厚面皮啦，所以呢樣嘢個主動權都係在於觀眾。事實上我哋都好努力去keep住個新鮮感，所以不時都會轉形象，初時好多人都睇死我哋過唔到兩年啦，但係我相信Twins起碼重有六、七年，最多三十歲時改過個唔好咁白癡嘅名囉！」
「阿爸好低B，阿媽靚到爆」
阿Sa現時與一個認識多年的女性朋友同住有兩個多月，不過她坦言與父母同住沒有太大分別，阿Sa說：「基本上我阿媽日日都會上嚟幫我執屋同煲湯畀我飲，我每日一瞓醒就會見到佢。」
阿Sa的父母自小已對女兒十分信任，她堅信這是因為自己事事都會向家人坦白，阿Sa笑說：「我十五歲第一次拍拖時，已經好快帶男朋友畀佢哋見面。」阿Sa的父親十分緊張女兒平日的演出，她說：「我阿爸真係好低B㗎，雖然佢哋次次都話我做戲做得好，唱歌又唱得好，但係我阿爸睇完我嘅戲同演唱會之後，實會寫一個觀後感畀我，真係好搞笑。同埋佢間中都會攞我啲T恤着，有一次我助手見佢着件好型嘅T恤，之後重讚佢好型，其實件衫係我嘅！以前讀書時，佢重攞命到着條粉紅色牛仔褲加彩色衫去見家長㖭。」
阿Sa揚言其母年輕時是一位靚女，她說：「我阿媽後生時靚過我好多啦，佢當時冇乜錢買衫同化妝品，不過佢又識自己車衫，而且啲皮膚又靚到爆。」
對於已離異的父母再結識另一半，阿Sa深表支持，她說：「佢哋識得點樣去處理啦，唔通要我介紹埋男女朋友畀佢哋咩！」孝順的阿Sa原來每日都會為家人上香祈福，她說：「我可以畀晒佢哋嘅嘢都已經畀晒啦，惟獨係健康呢樣嘢我畀唔到佢兩個，所以我好想佢哋可以注重自己嘅健康，生活得開開心心。」
「愛情事業冇可能一齊」
大部份少女都希望愛情降臨自己身上，不過阿Sa卻顯得非常抗拒，她說：「我真係冇心機去拍拖，我太忙啦，總之老實同你講我一啲都唔恨拍拖，愛情同事業冇可能一齊，咁樣個秤就會唔對稱。」
提到阿Sa近來有沒有追求者時，她不情願地說：「呢啲唔好講住啦。」但與阿Sa談到未來家庭及丈夫時，卻表現得十分雀躍，她說：「我將來一定要生幾個小朋友，每星期都要有familyday，大男人我都可以接受。我個老公唔使有錢、唔使靚仔，但係就一定要專一。」阿Sa亦不排除有一日會突然生BB，她說：「我真係超鍾意小朋友呀，不過我一定唔會放棄事業，大不了生完咪再出番嚟唱歌。」
撰文：李珮洳
攝影：林德雄
場地提供：麗嘉酒店
服裝提供：連卡佛
