除咗開市頭頭嗰4分鐘，恒指變化全日都係正數，最高之時升114點，埋單只升34點。單係隻滙控（005）升1.50元，已經扯高咗恒指54點，即係其他32隻恒指成份股，夾埋拉低恒指20點，算係應酬式整固。
窩輪龍虎榜上，10大有7件係滙控C輪，升幅由22%至36%。
死火榜上，則10大有8件係電盈C輪。滙控C輪，好多嘅槓桿率講緊若干十倍，其他藍籌又冇出色表現，滙控C輪自然好易上龍虎榜。電盈派半年成績表，盈利雖增，但股息唔係即時派，市場唔收貨，股價散6.4%。電盈C輪唔少溢價半天高，槓桿率又勁，跌起上嚟，跌幅跟正股乘以若干倍，自然上死火榜。
中銀C輪：中銀C輪9408收1.4仙，升幅17%，唔係乾升，有17.4球易手，平時多數得幾十萬份。隻輪明年1月到期，冇錯重有3個月命仔，但溢價22.9%，正股（2388）要上到17元（𠵱家13.95元）難度好高，隻輪多數冇得剩。中銀睇好，買C輪都係揀番啲數據比較實際啲嗰隻。咪淨係諗住刀仔鋸大樹，刀仔通常鋸唔到大樹，只會刀仔斷而樹仍完好。9169與9981乃係正路之選。
華豐認股證：紡織相關股華豐（364）連升兩日，是日收85仙，單日升幅6.3%，帶埋隻公司輪2303升上22.4仙，升幅17%。2303係公司02年8月上市所附送嘅贈品，明年8月到期，溢價2.8%唔貴，但槓桿率3.8倍唔算爆炸，而交投一向唔多。炒輪，呢隻唔係對象，睇好正股嘅話，應直接向正股埋手。
章盛