噚日馮仁昭睇報紙，話法律界殿堂級人物、現年九十四歲嘅胡百全律師近年身體唔係幾好，幾個月前已經喺瑪麗醫院留醫，佢前日透過自己創立嘅律師樓，以個人名義向高等法院入稟申請禁制令，禁止「二奶」身份嘅黃夏蕙去病房探望。
其實黃夏蕙同胡百全喺五一年認識，黃夏蕙雖然同佢冇結婚，但都生咗六個仔女。
黃夏蕙同馮仁昭講話趁禁制令未生效，前晚就嗱嗱臨爭取機會去醫院見愛郎，可惜胡百全病房外有保安把守，硬闖亦唔成功。黃夏蕙同保安爭持時，佢話搞到自己隻手扭親，噚日重痛到要去睇跌打㖭。
黃夏蕙前晚食完閉門羹離開醫院，喺樓下俾一名自稱係胡百全律師行嘅職員攔截，佢夾硬將一叠文件交畀黃夏蕙睇，馮仁昭估計嗰份就係禁制令，但黃夏蕙死都唔肯接，由得份文件跌落地，律師行職員最後惟有將份文件執番帶走。
問黃夏蕙點解唔攞份文件睇吓，佢噚日喺電話度話：「佢突然閃出嚟質啲嘢畀我，點知會唔會係一包白粉，我梗係唔接啦，我覺得胡百全𠵱家好似坐監咁畀人困住，好可憐，我話晒都同佢生咗幾個仔女，檻過門都係胡秀雯老母，唔明佢點解咁對我。」
許冠傑（阿Sam）十月十號至十七號喺紅館再開八場個唱，門票本來喺下星期一公開發售，但因為內部認購反應太過熱烈，主辦單位恆藝亞洲負責人丘亞葵噚日話決定將賣飛時間延遲，佢話：「我哋想等埋紅館批阿Sam十月八號同九號加場呢個期，一次過發售十場嘅門票，暫定下個月七號賣飛。」
Boy'Z成員Steven嘅媽媽早排吞下過量安眠藥入院後，Steven幾兄弟姊妹都多咗陪阿媽，噚日Steven家姐張詠恩同另一細佬由屋企出嚟時，張詠恩話佢哋探完媽媽出街食飯。對於有街坊話見到Steven媽媽前日出街買餸，睇嚟重有啲面青，張詠恩話因為有好多親戚嚟探訪，所以媽咪先去買餸，𠵱家佢身體無恙，亦唔使覆診喎。
由徐小明擔任會長嘅香港電視專業人員協會，上年十月開始向內地廣播電影電視總局反映香港電視人嘅訴求，今年六月又去信工商及科技局局長曾俊華。噚日政府宣布CEPA落實內地電視黃金檔期會放寬香港同內地合拍嘅電視劇播映。徐小明噚日同馮仁昭講話好開心，因為努力已見成效，佢哋會繼續爭取電視劇入口內地嘅配額，同埋放寬創作人員同演員嘅人數等訴求。
鄭希怡（Yumiko）同Boy'Z噚日喺旺角出席「英皇新秀歌唱大賽2004準決賽」，其中男子組合NSquare先拔頭籌奪得「最具人氣獎」。擔任表演嘉賓嘅Yumiko話：「我兩年前都係新秀出身，我覺得自己大個咗，好似姐姐咁。我都會同佢哋傾吓心得，叫佢哋上台演出時投入啲。」
