《新聞週刊》擺董生上封面，故意選咗一幅抿嘴、似緊張、似唔高興，冇啲歡容嘅大頭相，直情係攞景，而且故事內容講到董生治港十年之後（到二○○七），只會留下一件畀港人記得嘅事，就係逼使港人團結、爭取普選。特首辦睇完，唔面黑就假嘅。
船務W睇完，對眾老友講：「其實鬼佬記者有所不知，我哋航運界消息靈通人士就知，董特首來自航運界，要在十年特首任期期間，留下一件大紀念物，或者鬼佬叫legacy（遺留物）畀香港人，你估係乜呢？」真係唔知喎？大家靠估：母語教學？教改？八萬五？科技港？公務員體系改革？還是六十八個月通縮？
船務W笑罵眾人：「你哋都儍嘅，以上各項政策有啲未竟全功，有啲半途而廢，有啲害親各位嘅荷包，都唔係好嘢。嗱，聽航運界啲大佬講：「董生想話推動興建十號碼頭，作為佢老人家臨別秋波之作，夠轟動喇啩？起一個貨櫃碼頭要搞好多年，九八年六月開始講興建九號碼頭，到現在都未完工，要到○五年至全部起貨，九八年六月開工之前重爭拗咗六年呢！假如董生能夠排除萬難，喺佢退任前搞掂十號碼頭，譬如話○七年一月開工嘅話，後人都會話十號碼頭係董生嘅legacy，開咗個頭之後，第三任特首想話擱置都難好多啦！」
分析K聽完立即反駁：「唔信，《文匯報》八月二十號報道麥肯錫研究報告指出，現時未有數據顯示香港急需十號貨櫃碼頭，可以等多起碼兩年觀察變化先至再睇有冇需要；另外，港口發展局研究報告話要到二○一○年先至需要興建十號碼頭，目前九號碼頭都未用盡，咁快起多一個嚟做乜！」船務W話：「你聽古唔好駁古，用數字分析，夠晒邏輯，不過啲顧問都儍嘅，搞政治有邏輯嘅咩，睇邊位話事之嗎！」