月中經紀黃曾品題的魏橋紡織（2698），噚日公布截至今年6月底止中期業績，果然真係靚到嚇你一跳，盈利比起舊年同期勁升50%，有成3.57億元人民幣，連最樂觀嘅分析員都估唔到咁勁。
經紀黃笑笑口咁話，睇嚟班分析員下周又會調升魏橋盈利預測同埋目標價。小初記得今個月初，多間外資大行已分別出報告將魏橋目標價調高至15元樓上，唔知今次又會睇高幾多呢？
魏橋股價噚日冇起跌，平收12.25元，成交股數216.8萬股，金額2659.7萬元。
經紀黃話，舊年因為棉價急漲的原故，紡織股一直冇運行，但棉價最近已經回落，並估計回落情況持續，加上明年美國撤銷配額限額，點睇都對魏橋有利。另外，就算在環境最差之時，魏橋的毛利率都高過同行，所以分析員先至睇好魏橋。查實早在公布業績前，好幾個芬佬已經在市場上增持魏橋股份，行動已經反映咗佢哋點睇。
榮盛科技（1166）下面嘅星采控股（559），近日股價穩步上揚，噚日再升3.64%，收5.7仙，成交股數有3564萬股，金額198萬元。除咗貨源夠乾之外，小初尚未諗到其他炒作藉口。
慕容小初