沙田第一城單位多，買賣活躍，夠眼光隨時可以短炒賺錢，利記周德龍話，有位換樓客重厲害，竟然可以貴賣平買，認真高手。
呢位換樓客原本住二十一座高層C，三百九呎，裝修企理，以一百二十五萬沽出，每呎三千二，高市價八個巴仙，三年執三十五萬。
佢隨即以一百五十六萬，買入一座中層B，五百四呎，每呎逾二千八，低市價五巴仙。一出一入都係理想價。
周德龍話，第一城本月交投活躍，有五十宗，比上月多七成二，呎價企穩二千八。
新地郭氏兄弟對公司品牌好緊張，老二郭炳江，不時去旗下物業做家訪。新一期新地會會訊提到，上個月江少帶埋多個部門高層，去西半山寶珊道1號、何文田山1號、將軍澳維景灣畔同長沙灣昇悅居做家訪，見過十個家庭，了解住客心聲。
原來唔少住戶之前住過新地樓，唔怪得住維景嘅茅先生話，○二年未睇過示範單位就買。
住何山嘅古先生，建議新地，喺露台安裝活動晾衫架，江少即刻指示有關部門跟進，研究採用嘅可能性。呢類家訪真係有益有建設性。
近排豪宅買賣幾驚人，早兩日每天都有億億聲成交。好似盈大主席李澤楷嘅山頂歌賦山道二十八號，日前以億三賣出五號屋。買家係新蒲崗實業廠家，又係中原九龍組鑽石山分行王靜娟嘅客仔。呢個廠家以往有投資物業，買過鑽石山星河明居與九龍塘嘉皇臺，今次過江去山頂買大屋，一出手就成億。
蘭西提過，油麻地窩打老道八號，有二百幾個放盤，部份投資者唔睇好後市，寧願蝕少少，沽貨離場。隨着入伙日近，成交增多，啱啱又有一單。
香港置業鍾坤文話，窩八第二座高層A，五百七呎，以二百二十二萬易手，每呎近三千九，買家住開新界，最近轉工，要輪班，所以諗住搬出市區住，方便返工。
業主三月以近二百二萬購入，帳面微賺四萬，計埋使費，應該都要損手。
蘭西
電郵地址：