電訊盈科（008）噚日公布中期業績，盈利有8.05億元，但最令人感動就係如無意外，11月有5.5仙股息派發。
想當日，蟹咗嘅電盈股東難計其數，家陣終於等到好有機會有息派，實在想向蒼天大叫三聲多謝。
經紀黃話，希望電盈賣咗固網電話業務畀網通之後，仍然生生性性，否則點對得起一眾小股東？
與此同時，電盈下面的盈科大衍地產（432），亦順便公布今年1至6月業績，由虧轉盈，盈利有2.12億元。
經紀黃話，由於大市轉勢，地產股及銀行股熱炒，盈大地產持有唔少優質項目，實在係一隻有留意價值嘅二三線地產股，但問題係隻股重未夠公眾流通量，阿媽隨時會減持，而最怕係大折讓批股。
盈大有錢賺，主因當然係貝沙灣住宅熱賣所致，貝沙灣現時尚未賣完，理論上重有利潤慢慢可以入帳。
此外，盈大據講會在第4季公布旗下多個電話機樓的發展詳情，所以唔好話唔夠藉口炒作。
盈大地產在連升3日後，噚日跟隨其他地產股一齊回落，微跌1.15%，收2.15元，成交股數318.69萬股，金額686.7萬元。
慕容小初