精明消費：
層層叠有轆儲物箱移動方便又慳位
香港地少人多，居住面積寸金尺土，可惜大家都係天生購物狂，閒時買來大量雜物，卻不懂為它們找個安身之所。所以收納便成為我們的一大課題，在未有資格搬進萬呎豪宅之前，不妨利用儲物箱，將雜物臨時安置。由於需求大，現時的儲物箱除向上發展及可叠在一起外，更有附設車轆的，要推去邊都話咁易。另外又有抽屜式儲物箱，方便你隨時找出日常所需用品。
記者：張穎麟
攝影：陳陶鈞、黃子偉
Model：Cody
有轆儲物箱叠高收納最慳位
喺香港幾乎每家每戶都有幾個收納用的儲物箱。現時的儲物箱，由最初的四四方方，改良加入車轆，既可將之叠高又方便推動，夠晒好用。
車轆靈活好易推
尺寸：53×39×34cm
由於收納用的儲物箱多數會盛載大量雜物，如果車轆唔靈活，推起上嚟就無咁順暢。呢款連蓋塑膠儲物箱的車轆就夠晒靈活，就算只配上短短的手柄，亦能輕易推動。
售價：$34.9(c)
不易碎塑膠
尺寸：39×29×20cm
屋企有個百厭仔，害怕膠製的儲物箱萬一爆裂後，其裂開的膠片會危及家中的小朋友？呢款以不易碎塑膠製造的有轆儲物箱，就可以令你好放心，因為就算不小心將膠箱弄爆，碎片也只會大大塊，易於清理。
原價：$28.9
特價：$24.9(c)
收納衣物一流
尺寸：60×46×18cm
呢款矮矮平平的有轆儲物箱，乃專為收納衣物而設，擺放摺好的衣服後，便會貼貼服服不易弄皺。面蓋上設有一個透氣孔，可令空氣流通，加入防潮珠後，都可以畀衣物唞唞氣。
售價：$49.9(d)
梘水一抹就乾淨
尺寸：39×39×39cm
呢款Vessla有轆儲物箱，採用的質料可用肥皂溝水直接清潔，清洗後光潔如新，耐用得多。而箱蓋的通窿設計可方便查閱箱內情況，採用的聚丙烯塑膠，亦可循環再用，為環保出一分力。
售價：$59(a)
抽屜式儲物箱方便搜尋
選用揭蓋式的儲物箱，萬一要在其中一個儲物箱找尋東西時，那就弊家伙，因為要逐個箱搬開，浪費氣力和時間。所以抽屜式儲物箱就最啱收藏日常用品，就算叠到幾高，一拉抽屜就可以找到所需用品。
加設透氣孔
尺寸：48×35×30cm
衣服放在儲物箱內，如果完全密封，有機會焗出一陣異味。呢款儲物箱就在蓋上加設透氣孔，令箱內空氣更加流通，而儲物箱的車轆亦算靈活，就算連續叠起幾個，都可以推得好輕鬆。
售價：$29.9(b)
裝得穩陣
尺寸：47×34×28cm
呢款Tee-Box有轆儲物箱，款式設計唔算特別，最大賣點係儲物箱手挽位的扣，上鎖後就算將儲物箱左搖右擺，箱內物件亦不會翻出。配合埋面蓋上的坑紋，就算將儲物箱叠高都相當穩陣。
售價：$29.9(b)
最大最穩固
尺寸：48×36×116cm
呢款Soho抽屜式儲物箱，五層高的超巨型氣勢，足已令它與其他木櫃分庭抗禮。最抵讚係每格抽屜拉出都非常順滑，而無轆設計亦令儲物箱更穩陣，就算五層高亦不會搖搖欲墜。
售價：$185(c)
扭蛋Figure有着落
尺寸：43.2×32.9×105.8cm
呢款Style五層塑膠抽屜式儲物箱，放棄選用透明抽屜，最適合小朋友存放凌亂不堪的玩具，甚麼扭蛋、積木統統一次過收藏。每格內櫳亦有十足空間，就算大大件的合金、Figure都一樣放得落。
售價：$165(c)
小巧方便四圍推
尺寸：63×37×70cm
如果想要有轆兼日本製的抽屜式儲物箱，呢個小巧儲物箱係一個好選擇。二層高抽屜的設計，夠晒輕便，無論有沒有載物件都一樣易推。日本製造，用料特別穩固。
售價：$279(d)
仿藤設計質料硬淨
尺寸：47×41×25cm
呢款來自台灣的單層儲物箱，其抽屜面就採用仿藤織的設計。選用的塑膠比較厚身，將抽屜拉出或推入時，也不會有一般塑膠輕飄飄的感覺，硬淨得多，可將多個儲物箱叠高使用。
售價：$79.9(d)
有轆青蛙仔更好用
尺寸：18×47×80cm
可愛青蛙仔Kerokerokeroppi亦有推出四層抽屜式儲物箱，用料雖較單薄，但有轆的設計，在多層式儲物箱中實屬罕見，值得加分。箱身設計較窄，適合放在小朋友的睡房。
原價：$269
特價：$199(d)
特深設計夠實用
尺寸：51×46×35cm
日本Cospa二層抽屜式儲物箱，設計較為少見，櫃子上方設有兩個細抽屜，方便將內衣、襪子等分門別類。下層抽屜深達50cm，最適合放牛仔褲，亦可將之擺放在衣櫃內，加埋有轆設計，功能齊全。
售價：$169(d)
設計不易解體
尺寸：37×70×62.5cm
市面很多由自己裝嵌的多層式抽屜儲物箱，一將佢搬起便會自動解體。幸好呢個日本天馬株式會社出品的三層抽屜儲物箱，用上不易解體設計，一旦組合完成，就算搬來搬去都一樣穩陣。
售價：$235(b)
玩Design儲物箱突圍而出
無轆的儲物箱，的確無咁方便，為了力挽狂瀾，這類儲物箱便一於以設計取勝，不但以斜面、六邊形設計，甚至採用環保紙製造。除了基本儲物功能，更可融入於室內設計，凸顯個人品味。
有埋手抽夠方便
尺寸：54×41×74cm
大部份抽屜式儲物箱都不會設有手抽，呢款和風儲物櫃，每層都有兩個手抽，方便易拉。抽屜面的花紋，同樣採用仿藤設計，帶點東洋味道，由台灣製造，構造都算紮實。
售價：$235(b)
有轆冇轆自己話事
尺寸：31.5×45.5×21cm
呢款抽屜式儲物箱，可將多個儲物箱叠高，車轆可以自由拆卸、安裝，就算叠在一起時都不會有滑來滑去的問題。另有藍色可供選擇，顏色任意配搭。
售價：$35(b)
不同系列都叠得
尺寸：42×30×23cm
呢款Trofast儲物箱，除了可與同系列儲物箱叠在一起外，更可與Lo系列的儲物箱叠埋一齊，特別慳位整齊。另外，它亦可另加導軌，將儲物箱安裝在衣櫃層板內。
售價：$20/箱 $10/蓋(a)
箱蓋玩色搶晒鏡
尺寸：44×55×42cm
大部份儲物箱都用揭蓋式設計，不過呢款Keyway膠箱就改用了左右頂揭式設計，夠晒另類，不過就不可以將儲物箱層層叠。最成功係箱蓋選用搶爆鏡的橙色，令外形變得摩登。
售價：$49.9(c)
特大儲物箱
尺寸：55×73×32cm
呢款Slugis儲物箱，擁有特大容量，值得留意係另加的面蓋，可作半開狀態，就算遇到狹窄環境，也一樣容易取出物件。
售價：$99/箱$29/蓋(a)
售賣點：
(a)宜家傢俬31250888
(b)日本城28730110
(c)實惠26638833
(d)吉之島28846888
環保實心紙板
尺寸：45×36×17cm（每個）
超過90%的儲物箱都是以塑膠製造，呢款Lyckeby連蓋箱卻反其道而行，以100%環保實心紙板製造，毀壞後仍可循環再用。儲物箱的箱蓋附有繩子，讓你可以更易打開箱蓋。
售價：$119/2個(a)
品味儲物箱
尺寸：39×55×45cm
Sortera儲物箱不甘平凡，換上斜面的箱蓋，最襯講Design的品味家庭。但別以為斜面設計便不能叠起，佢一樣可以穩固地向上叠高，夠晒慳位，產品物料同樣可以循環再用。
售價：$139(a)