「世紀偉人──紀念鄧小平誕辰一百周年」展覽噚日開幕，唔少高官名人都爭住出席，可以講話係衣香鬢影，不過獲邀出席嘅全國人大代表李鵬飛就臨時「甩底」，唔理老鄧呢個「約會」，走咗去參加「爭取全民退休保障聯席」嘅記者會，為班老人家爭取退休保障。
下年就合資格領取長者卡嘅飛哥話，揀咗嚟呢個記者會覺得非常值得，佢老兄講到尾聲不忘狠批老董過去七年施政得個講字，淨係識得益班有錢佬，聽到台下班老人家拍晒手掌，大讚飛哥敢言，睇嚟飛哥今次真係冇選擇錯誤。
又立法會選情愈嚟愈激，候選人梗係絞盡腦汁諗計出位宣傳，好似鄭家富前日畀佢諗到條橋，就係企喺調景嶺地鐵站大堂，乜都唔做，淨係點頭揮手，阿富就以為咁樣冇事，點知地鐵站站長打去電台，投訴阿富做法唔妥。
但阿富就同八方呻，其實佢真係冇犯任何地鐵規例，因為地鐵只係話唔准叫咪，唔准拉橫額，冇話唔准企喺度喎！
公平啲講，阿富今次只係踩界，並無過界，地鐵除非改例唔准立法會候選人喺地鐵站企喇，人哋有腦諗到計，你都冇符架！
傳真︰2623-9278
電郵︰