鄧小平忌辰一百周年，老鄧個女落嚟致辭，講到伯爺佢生前點樣慈祥，喊到淚水汪汪。佢又話鄧伯爺生前好想落香港睇睇，可惜未能如願。不過，若然鄧伯在天之靈，見到據講係佢所發明嘅「一國兩制」搞到咁，可能喊得重激動過佢個女㖭。
為全線抗民主派選舉，中方大力催谷，又奧運金牌選手獻技，又搞深化屍爬，唐唐上大陸見安民，之前又出席穗港合作會議，大力鼓吹港商去廣州投資。
穗港合作、港商去廣州投資，又係咪一條正路呢？香港老愛國商人霍英東嘅頭馬，近日喺某報發表回憶性文字，大爆我哋霍老當年想投資廣州南沙，點樣俾人呃、俾人蝦嘅內幕。呢幾篇文章無疑係極有指引性，正所謂鑑古知今，港商北上投資，係咪應該要記得霍老嘅教訓呢？
不過，去多啲大陸投資，無論有冇得賺，點都係積陰德嘅。例如維記牛奶，返去投資多啲，咁就會幫助吓個大陸市場清洗吓啲假奶，令到大陸同胞有真奶奶飲，飲少啲山埃奶、甲醇奶、砒霜奶，不過唔好處就係，維記牛奶上咗大陸設廠，上高有真牛奶賣，第日自由行落到香港又買少一樣，咁咪影響香港零售業，搞到啲百貨店請少幾個人？加埋就算喺上高製作牛奶，咁就要用上高啲牛，到時又點樣保障啲牛唔係假？
所以話中港一體化，唔係瓣瓣都辣。有霍英東咁嘅身家，兼喺中南海咁嘅人脈，上到廣州都俾人蝦，阿豬阿狗拎住篋銀紙上去，變咗一隻羚羊，好容易做咗一批猛獸嘅點心，咁就後果自負咯。
至於鄧小平，忌辰一百周年，點都要慶祝吓嘅。究竟治港者係「愛國者為主體」，抑或係「各派都要有、右派也有些」，鄧小平講過「照樣可以罵共產黨」，咁點解罵共產黨毓民要封咪，鄧小