風波不斷嘅商業電台噚晚喺美麗華酒店舉行四十五周年台慶酒會，大老闆何佐芝、何驥同話事人俞琤都有出席，喺大喜日子商台公關先旨聲明唔會講封咪事件，以免破壞氣氛，商台上上下下亦好識做，隻字不提鄭大班、毓民同飛哥等名字，總之一片歌舞昇平，祝酒飲杯。
何佐芝雖然一把年紀，都玩得唔知幾投入，唔知係咪已經回復晴天，可以再出發呢？趁住大家咁高興，商台正式宣布創作總監阿旦鄭丹瑞於本月底離職，商台更打咗隻金飯碗同一對金筷子畀佢，寓意商台同阿旦情比金堅，並預祝佢喺電影圈一樣咁吃得開。
記者打電話問已經同商台情盡嘅大班有乜感覺，佢話冇，大班忙於參選，商台慶祝台慶，當然唔會再請佢，而商台總經理陳靜嫻就同記者講，大班同林旭華唔會再喺商台開咪，解約係必然嘅事，至於收聽率下跌嘅《風波裡的茶杯》前景，十月商台節目大調動時就有分曉喎。
傳真︰2623-9278
電郵︰