噚晚馬會舉行周年大會及董事選舉，大熱門許晉奎順利當選做新任董事，另外三位董事鄭明訓、李國棟同郭勤功成功連任，全部任期三年，董事局又選出夏佳理及陳祖澤分別連任馬會主席及副主席。
人稱「大奎」嘅許晉奎，頂替中信泰富主席榮智健引退騰出嘅空缺，榮大董因為頸部健康問題，提早一年退出馬會董事局。
本身為康體發展局主席及香港奧委會副會長嘅大奎，同時係廣東省政協委員，銜頭多多。九九年，佢阿哥許晉強唔再做馬會大董時，大奎原本有信心接棒，點知輸咗畀孖士打律師行合夥人之一嘅葉錫安。今次晉身「大董」行列，總算一償多年心願。
大奎早於七二年加入馬會，八八年成為遴選會員，名下馬全部以「金剛」命名，最為人熟悉係○一年贏過皇太后盃嘅「神彩金剛」，現役名下馬有「神龍金剛」及團體馬「南華九十」、「好朋友」。「大奎」向來喺足球圈好有地位，由佢擔任馬會董事，相信可以對馬會經營足智彩及賽馬都作出貢獻。
傳真︰2623-9278
電郵︰