近期傳媒業特別熱鬧，之前有人傳超人李嘉誠嘅紅顏知己周凱旋要買《信報》，其後超人亦公開話極之有可能收購傳媒。最新消息係，有份名為《觀察星報》嘅商業周報面世。
八方噚日收到《觀察星報》新聞發布會嘅邀請函，裏面介紹，份報紙係一份全國的中文商業周報，針對新一代管理人員同商界精英嘅需要，提供詳盡嘅中國市場分析同營商機會。講到呢度，看官係咪好想知邊個係份報紙嘅搞手？之唔係陽光媒體嘅吳征同楊瀾夫婦（圖）囉。份報紙乜嘢樣暫時未知，但最吸引八方嘅係，發布會請咗上海姑爺羅康瑞做主講嘉賓，唔知係咪同羅康瑞喺大陸吃得開有關。
講開傳媒，八方噚日見到上市公司美亞娛樂嘅通告，委任「愛國歌手」張明敏做獨立非執行董事。張明敏轉戰內地市場多年，搵佢做董事，明顯係吼住大陸市場。
傳真︰2623-9278
電郵︰