選舉臨近，刺激新聞陸續出籠，先有候選人涉嫌在東莞召妓，繼而有候選人與所屬政黨有租務關係（立法會秘書處話：現時並無規定議員不可租用自己或其政黨的物業作辦事處。至於議員向秘書處申領有關租金開支是否理想安排，要由議員自行衡量。），跟住大才子陶傑竟然榮登周刊封面，周刊話佢穿梭時鐘酒店喎。呢三位被針對嘅人物，咁啱都係泛民主派，陶傑唔係政治人物，但係佢罵人罵事往往一針見血，被罵者恨陶傑入骨，所以陶傑在選舉倒數時間內，被捲入風波，不足為奇。不過佢唔參加競選，大可置諸不理。
呢日喺Kiku食完飯行出街，見到陶傑相片，當然立即買份周刊睇清楚，順便做吓「民意調查」，報販居然話：「咁多炒作都唔會影響選票嘅，可能會激起選民爭住排隊投票㖭。投票率高，你話會益邊一派吖？」
唔知噃。返到公司，Newsweek寄到嚟，封面竟然係老董大頭相，咬住個嘴，標題係AfterMeDemocracy（即係我走咗就有民主），內容講到老董係香港民主之父？原來係諷刺式，《新聞週刊》指老董治港七年，搞到平時只會拜金嘅香港人上街要求民主，民建聯都話爭取二○一二年普選，故此老董直情係香港民主嘅FoundingFather（？）唉吔，老董實唔會睇呢期嘅《新聞週刊》咯（可能期期都唔睇），如果特首辦睇唔過眼，或者由香港頭號寫信佬林煥光致函《新聞週刊》，為特首辯護喇。
睇完陶傑封面，再睇老董封面，咭一聲笑出嚟，呢個世界實在好滑稽。鄭大班對《新聞週刊》講：「一隻SaintBernard話佢係民主派，都會有選票！」抵死到極，唔養狗之人，就要查字典先知道SaintBernard係乜！