八方噚日睇報紙，見到左報用好多篇幅介紹喺華潤大廈香港展覽中心舉行嘅紀念鄧小平誕辰一百周年展覽，當中有一位曾慶淮先生講咗好多嘢，除咗勁捧鄧公貢獻偉大之外，重叫港人要將香港建設得更繁榮、和睦同美好，以告慰鄧公，真係語重心長。
咁梗係啦，呢位曾先生絕對唔係一位普通大陸官員，佢阿哥就係中央負責香港問題嘅最高負責人、國家副主席曾慶紅。
聽講曾慶淮一早已經嚟咗香港做嘢兼收料，佢做董事長嗰間中華文化城就係今次展覽八大主辦機構之一，而且掛頭名㖭。
中共最叻搞宣傳同統戰，曾慶淮喺文化活動方面十分活躍，不時安排啲大型文化表演節目嚟香港演出，加強溝通，所以千祈唔好睇小曾慶紅嘅收料本事，連白鴿黨嘅李柱銘同楊森都係曾慶淮請去出席開幕禮。
另外，賭王何鴻燊都有去睇展覽，佢一定對中央信心爆棚，竟然話保皇黨9.12可以攞到三十二席，又話香港人鍾意安居樂業，只係一小撮人喺度搞嘢。
（圖）曾慶淮係國家副主席曾慶紅細佬，好叻幫阿哥在港收料。
傳真︰2623-9278
電郵︰