借住美股高收，恒指最高12843，連番急升後有啲啲超買，9RSI上到80嗰頭，埋單應酬式調整，微跌8點。等個市冇咁超買，稍事休養一吓，再嚟過，上破萬三點睇嚟冇走雞。
和黃C輪：李超人喺長和系派成績表後，急不及待連續3日買入和黃（013）540萬股，銀両3.2億元。和黃昨日收61元，冇升跌，早段最高見過61.50元，暫時未見超人效應。和黃近排升得急，唞唞氣好正常，喺全球大市氣氛轉好之下，和黃嘅超人效應料會出現。有統計話，超人往時增持和黃之後，喺好短時間之內，和黃股價上升嘅次數佔9成。按此攤路，要買定啲和黃C輪。
和黃C輪，正印係9780，10月中到期，輪價57仙，負溢價0.5%，槓桿率10.7倍（有效9.1倍），引伸波幅24%。和黃中期息0.51元，計埋股息因素，隻輪都係平水，對正股反應會好敏感。和黃趣趣哋喺個半月內升3元，5%幅度唔夠，揸隻輪有權賺5成。和黃C輪副印係2193，但爆炸力同9780相差好遠。
中企C輪：國指昨日叻過大市，有35點進帳，有中鋁（2600）、中電信（728）、大唐（991）、上石化（338）等帶住上。短期內，國指有力再上多三兩百點，搵中企C輪短炒，有贏面。
中企C輪主角係9948，10月尾夠鐘，輪價7.5仙，溢價5%，槓桿率15.8倍（有效8.7倍），引伸波幅36%。9965條件同9948差唔多，但交投則以9948大得多，賺錢走人與輸錢離場都易好多。
章盛