無綫和亞視奧運節目鬥得如火如荼，日前兩台攝製隊採訪上周六中國對香港乒乓球男雙決賽，兩台記者爭相訪問香港奧運銀牌得主、乒壇孖寶李靜同高禮澤，有指葉璇採訪時涉嫌搶位，影響亞視拍攝；但亦有報道指亞視打茅波衝出指定採訪區搶位，引起混亂。
馮仁昭聽聞亞視不滿俾人屈，所以專登問中央電視台借咗當日事發拍低嘅搶位片段，諗住前晚播出街，不過聽講無綫有人收到風，即刻打去中央台加以制止。
無綫奧運節目監製李漢源噚日喺雅典接受長途電話訪問，佢話：「我想講採訪區一早定好，大家都冇得搶位，而且我一早已經訓示所有旗下採訪記者一定要守規矩。」對於有指中央台將拍攝當日嘅搶位片段轉交亞視播映，李漢源又話：「中央台同無綫係獨家合作夥伴，我哋可以互通消息，我相信中央台冇可能將拍攝片段畀亞視，如果亞視話佢手頭有嗰條片，我都唔敢講點解。」
亞視奧運節目監製馬熙則在電話中度話：「中央台係國家電視台，冇可能啲片淨係畀無綫，其實奧運期間，亞視同中央台都有交換過片段，我哋借呢條片係想澄清坊間不實報道，不過我承認噚晚亞視準備播番條片頭三分鐘，真係接到中央台叫我哋唔好播，咁我哋都會畀面中央台，如果無綫冇做過又使乜出茅招，我相信觀眾都好想知道真相。」
上山詩鈉同老公孔小寶以前不時都表現得好恩愛，點知佢兩個原來喺兩星期前已經正式分居，協議離婚。聽聞以前孔小寶做警務人員嗰陣，佢兩公婆感情真係好好，後嚟小寶涉及一單案件後離職冇做，兩公婆嘅感情就開始走下坡，成日為小事嗌交，卒之兩個都頂唔住，喺上山生日前已經分居，上山重帶埋個女搬離跑馬地寓所㖭。
蕭正楠早前喺上海拍攝新劇《中華小當家》，因為呢套劇係以漫畫《中華鬥一番》做藍本，所以蕭正楠開工前都不停咁刨嗰本漫畫，希望演出時能夠投入啲。雖然內地天氣好熱，蕭正楠嘅古裝造型又要駁髮，不過佢就話一啲都唔介意，重好鍾意個造型。
賭王千金何超瓊四十二歲生日，前晚同公關公司同事喺鏞記食飯，佢話生日願望係事事開心，問佢想唔想搵一段真姻緣？何超瓊就話有老竇錫晒就夠，佢話：「嗲哋錫我咪得囉，佢嘅愛係永遠嘅，佢永遠都咁錫我㗎，不過佢𠵱家唔喺香港。」
Rosemary同Shine日前去到番禺一商場進行亮燈儀式同簽名會，吸引過百歌迷圍觀，現場一片混亂，Rosemary更慘遭鹹豬手。而Rosemary噚日同一班新晉模特兒示範點樣演繹珠寶，佢又畀貼士叫啲新晉模特兒多搽潤膚霜，令皮膚睇落靚啲。
