泰國電影繼○一年嘅《人妖打排球》大收後，近年喺國際影壇嘅地位愈來愈高，好似《TropicalMalady》就喺早幾個月嘅康城影展上奪得評審團獎，唔少香港觀眾亦開始對泰國電影另眼相看。
嚟緊喺下個月上映嘅《美麗拳王》就係一部相當具爭議性嘅泰片，呢部電影同《人》片有一個共通點，都係講人妖嘅故事，但係就唔係用《人》片嘅誇張搞笑手法，而係以同情人妖嘅角度去描寫一心想變性做女人嘅拳手龍唐嘅心路歷程。除此之外，龍唐打擂台嘅場面，全部都係拳拳到肉，冇花冇假，我羅拉覺得呢部戲可以話係《人妖打排球》同《拳霸》嘅混合體。
《美麗拳王》之所以拍得咁有真實感，最主要係導演亞格差烏干騰（EkachaiUekrongtham）特別花咗唔少時間去選角，佢從幾百個職業拳手入面揀咗曾經參加接近二百場拳賽嘅亞山里蘇璜（AsaneeSuwan）飾演龍唐。呢位二十三歲嘅拳手雖然第一次拍戲，但係已經憑呢部戲成為泰國影帝，認真犀利。
亞山里為咗扮好龍唐，佢喺電影開拍前一年已經好認真咁學跳泰國傳統舞蹈同芭蕾舞，兼且又要上儀態課同做皮膚護理，總之要搞到自己成個女人型咁，佢當然唔少得向真正嘅龍唐偷師啦！