皇馬同紅軍上季拉隊到亞洲作季前集訓，結果兩隊名牌球隊番返西甲同英超表現同成績都差強人意，今季齊換教頭求翻身；而紐卡素今季跟風到泰國同香港踢熱身賽，點知返到英超踢三場只得兩和一負，前晚對諾域治竟然領先兩球都被追和，氣結捧場客，唔通紐記中埋「香港魔咒」！？
雖然紐記領隊卜比笠臣曾話，球隊成績好壞同季前去邊度集訓冇乜直接關係；不過，我求大俠都替老笠擔心，因為佢同曼城領隊基瑾係英超尚未開齋嘅英格蘭名牌教頭，再唔贏波咪話唔危。
記得AC米蘭今個夏天都嚟過香港踢表演賽，如果佢哋今季成績唔好，都咪話「香港魔咒」唔邪門。
另外，紐記前鋒比拿美話唔想朗尼加盟，重話佢嚟就走；而老笠聽到佢咁講，就公開叫佢唔好講咁多嘢，稍後重要捉佢去照肺，要佢收聲專心幫球隊爭成績！隊波咁多麻煩嘢，點搞呀！
阿仙奴年僅十七歲中場費比加斯，前晚喺白界線前將G施華頭槌攻門截胡撞入成二比○之後，個個以為G施華入波走上前慶祝，難為費比加斯冇人理；呢位後生仔之前亦曾兩番射門幾乎入波！好彩佢最後俾球會認可為「士哥拿」，重成為球會史上最年輕聯賽入球球員。
格拉斯哥流浪喺歐冠盃外圍賽出局，後果可大可小；事關佢哋呢季大肆增兵使咗唔少錢，𠵱家踢唔到歐冠盃搵真銀，季尾好大機會出現嚴重虧損。佢哋死對頭些路迪啱啱重簽埋祖連奴呢位猛將，呢陣子個勢真係一面倒傾向些路迪。呢個禮拜兩軍就會喺聯賽對碰，到時識捧邊隊啦！
利華古遜明明喺兩個禮拜前嘅歐冠盃外圍賽領先俄斯特拉法五比○，所以前日踢次回合時，大部份人估利華古遜會留力；殊不知佢哋照排強陣，重輸一比二，樣衰不特止，重舟車勞頓損耗戰力。須知道嚟緊禮拜六佢哋要主場火併拜仁慕尼黑，拜仁職球員睇見利華古遜咁搞，唔偷笑至奇。
因危險駕駛搞出人命要坐六年監嘅前西布朗球員李爾曉士，認真唔自愛，日前啱啱開始牢獄生涯，就即刻未能通過藥物測試，懷疑入冊前曾吸食大麻，肯定有手尾跟。據有關方面講，通常十個犯入面只有一個被隨機抽中要受檢驗，李爾曉士就「中彩」，以佢品行絕對係球壇敗類。