澳門何厚鏵最近因為競選連任馬不停蹄同各界見面，噚日輪到同建築地產界開座談會，呢位濠江一哥果然非同凡響，一見澳門房地產最近出現人為推高，佢馬上公開叫停，一於消滅炒風於萌芽階段，唔知係咪見過香港嘅慘況知驚。
據何厚鏵嘅分析，澳門由於開放賭權、放寬自由行以及外資擁入嘅帶動，因此房地產備受睇好，樓價節節上升，炒樓集團蠢蠢欲動。佢呼籲業界要自覺，避免樓市出現泡沫，變成災難性局面，到時作為一個負責任嘅政府，佢會被迫採取宏觀調控嘅手段干預。咁無論係市場自我調整，亦話政府出手，都係會令社會有好大壓力，好多人一夜之間變成負資產。
鏵哥有言在先，叫啲地產商要發財立品，因為人人心內都有一把尺，「要過得自己，過得人」，唔好只係為咗牟取暴利，置社會安定於不顧。至於啲投者資，鏵哥就話佢哋永遠唔明白乜嘢叫做「食得鹹魚抵得渴」，冇法啦。
傳真︰2623-9278
電郵︰