九倉就快開賣嘅深井碧堤半島二期，售樓紙剛批出，下個禮拜先開放尖沙嘴展覽廳畀公眾參觀。呢個樓盤傍海而建，遠望青馬大橋，景觀自然係最大賣點。
發展商就地取材，噚日請嚟專門幫人睇術數風水大師麥玲玲，到物業現場指點吓。麥玲玲話，今年開始，香港地運踏入八運，面向西南見水嘅物業，較為旺財。向東北面嘅就旺丁。
咁啱碧堤半島二期單位，主要分前後兩排，向南至西南面單位，除咗有海景，重有青馬大橋、汀九橋至大嶼山景。後排向東北嘅兩房戶，望山巒，同麥大師講嘅風水景觀不謀而合。
麥大師話，雖然個樓盤兩房單位向山，較旺丁，但單身買家都可以考慮，因為會旺桃花。
另外，佢預言明年香港西南面同南面地區，樓宇炒賣活動頻密。
長實嘅東涌悅濤軒，又再出招吸客。
今次夥拍恒生銀行，向買家提供九成半按揭計劃，另外，頭三十個月重免供款，本金可以延期償還。
利息由發展商同銀行補貼，其間節省利息支出，相等於樓價超過五個巴仙。供款年期可以長至三十年，成交期為六十日。
不過，採用呢個付款計劃，不能享有即供減樓價百分之五優惠。
長實高級營業經理劉啟文話，逾一千二百呎四房單位，即將加價，幅度百分之四點一二。
樓市再度轉活，連外籍客入市個案都多咗，世紀21奇豐分行經理張勵山話，一對外籍兄弟，斥二千零十萬，連購兩座西貢松濤苑獨立屋。
其中五號屋二千三呎，花園千呎，連雙車位，由兄長斥一千零五十萬購入；而七號屋二千一呎，花園千呎，包雙車位，以九百六萬獲弟弟承接。
呢對嚟自歐洲嘅兄弟，一直住開西貢，上月中有意轉租為買，見松濤苑同時有兩伙放售，睇樓三次扑槌。
另外，中原分行經理潘綺萍話，一名韓籍客，以三百一萬，購入東涌映灣園二座中層H，逾千二呎，每呎近二千五。
一般人買樓，要左揀右揀，最後簽臨約，就畀樓價三至五巴仙作為定金，以防萬一發現問題，撻定亦不致太傷。但有對做生意嘅豪氣夫婦，租住寶翠園，鎖定該盤為置業目標，因工作繁忙，無暇睇樓同搞布置，日前跟中記睇一個雅致裝修單位，八百五呎，即晚落槌，以四百九萬成交，重闊綽到即時畀一成定金，簽正式買賣合約就畀夠三成。據聞，重有可能成交日全部現金交易。
生意人除咗水頭充足，數口亦精，聽中記講，因為業主趕套現換樓，要求買家畀三成樓價佢做首期。結果，單位成交價比市價平成十萬。
蘭西
電郵地址：
