港股噚日喺高位爭持,連續大升兩日後,整固一下,後市的升勢會更為健康。恒指收12784,跌8點,8月期指再現高水,9月期指則低水32點,同大藍籌除息有關。
噚日市勢雖呈反覆,但大藍籌同國企的大行買盤好活躍,成交161億元,資金入市之勢仍急,期指結算後,大市升勢再起,向13500至14000進發。
下一個升浪,大藍籌應該會輪到滙控(005)同中移動(941)發力;賺快錢,買Call輪可也,推介滙控嘅9772同2155,以及中移動嘅9813。中移動已升破下降通道,初步阻力在24.0元,整固後再上,目標指向28.0元。
國指已升破4250阻力,國企升勢將全面展開,噚日中國鋁業(2600)突放異采,帶領一眾國企闖關而上。短線揀股,中鋁係首選,金屬同石化股亦會有好表現。
細價股靜咗好耐,亦快到發力時候,特別係業績突出嘅公司,更值得優先留意。
就以力豐(387)為例,半年盈利增逾1倍,股價立即彈升15%。噚日宣布嘅德信科技(1228),中期亦賺多1倍,今年PE保守估計都只係4倍幾,股價有好大上升空間。
德科上半年營業額2.29億元,升23.0%,獲利5050萬元,升101%,每股盈利3.5仙。由於邊際利潤較高的新產品銷售理想,毛利率由前同期的21.8%提升到26.4%。
集團不斷開拓高增值電子消費產品,增加收入來源,其中新STN液晶體顯示屏生產線將會逐步投產,主攻外銷市場,由於呢類產品需求極為殷切,預期會成為集團增長的強大動力。
德科下半年業績應會有更佳表現,估計04年全年盈利達1.1億元,每股盈利7.6仙,預測PE僅4.6倍,05年更可上升到8.5仙,以PE6倍計,股價已可見0.51元。
星采控股(559)將易名為華藝銅業,上月斥資3.2億元收購銅業集團後,經已成功轉型,股價亦有良好反應,噚日升勢再起,收5.5仙,以長達4個月的大型圓底形態來衡量,短線上升目標指向7仙,中線有機會重上年前高位10仙水平。
郭兆誠