個市相當惡吓，恒指再升146點，收12793，有211億元大成交配合，破萬三點機會好大。重磅股有得睇，滙控（005）之後，相信會輪到中移動（941）。電訊股中，電盈（008）、聯通（762）同中電信（728），升幅都超過3%，中移動則只移動1.8%，有可能會跟番大隊，買中移動C輪，掂檔多過唔掂檔。
中移動C輪：中移動C輪主角係9813，呢兩日每日成交量190球，佔發行量5成半，12月初到期，輪價20.6仙，溢價2.4%，槓桿率10.9倍（有效7.5倍），引伸波幅28.4%。
中移動另外兩隻熱門C輪係9130同9907。9130壽命比9813長1個月，溢價7.8%，槓桿率10.5倍（有效5.9倍），引伸波幅38.6%。9907壽命比9813短1個月，溢價4.2%，槓桿率16.8倍（有效9.4倍），引伸波幅31.9%。計入壽命因素，有效槓桿率、引伸波幅因素，9813贏晒，搵銀要向呢件埋手。
中銀C輪：中銀（2388）收13.90元，升0.25元，升幅重大過滙控。先一排講過，中銀人事變化，頭頭拉落馬，咪當係衰嘢。去年中銀股價一支箭上升時期，始於劉金寶出事。壞消息入市，股價點解反而會升，用吓想像力諗吓。
中銀C輪9169同9981分別彈升14%同12%。呢兩件係主角輪，正股郁，佢哋都跟得相當貼。中銀由12.60元彈上13.90元，只係用咗7日時間，恐怕要唞唞氣。9169同9981，可以等回吐時先至上車都未遲。
章盛