今季幾個外籍領隊喺英超聯開閘搶盡風頭，難為一班英格蘭名牌教頭，好似基瑾、卜比笠臣、麥卡倫等，開季兩場重未贏到波；除咗冇晒「飛士」之外，分分鐘提早食到「豉椒炒魷」㖭。
曼城嘅基瑾就最危危乎，前晚又睇住球隊作客伯明翰輸○比一食白果，三戰未開勝門。無怪乎攝影師多次影住基瑾個愁樣，通常呢啲情況都係有預示被炒嘅信息，曼城班高層若果有睇到電視直播，更催化佢哋換人嘅信念！
話晒基瑾及卜比SIR等人對英超聯，甚至英格蘭足球都有好大貢獻，我求大俠真係唔想睇到佢哋唔夠班外省佬玩，好自為之啦。
有市有價嘅修咸頓射手比亞堤終於都係決定留隊；佢遲唔講早唔講，就喺前領隊史杜洛辭職之後至表態，我求大俠就更加相信兩人係有不和。話晒比亞堤喺球會都有份量，搵個不見經傳嘅史杜洛番嚟領軍，邊鎮得住呢位大哥吖！𠵱家史杜洛走人而比亞堤留低，可能係好事㖭。
前日國米贏巴素利，今個夏天威到震嘅阿祖安奴又再發威入波，之後史坦高域好快入第二球，最後國米大勝對手四個一皮。國米上半場初段踢到水銀瀉地，令全場五萬幾個球迷血脈沸騰。列高巴最抵死，話隊波頭二十分鐘好似電視遊戲嘅足球game一樣咁悅目，真架勢。
今季兩個意大利籍教練投身葡萄牙球壇，迪尼利早排「閃電」俾波圖炒魷，而查柏東尼亦唔見得風光，前日帶領賓菲加作客安德烈治捧三隻光蛋，出唔到線。賓菲加重金禮聘呢個老牌教練，當然希望球隊可以好似舊年波圖咁響歐冠盃有好成績，𠵱家失利，老查都算面目無光囉。
球員就有停賽，但聽過球證都要停賽未？我求大俠日前提到嗰位唔記得出示紅牌球證杜烏素，終於有定案，俾英超聯賽會罰停賽一個月，認真少有，下個禮拜一曼聯對愛華頓補賽就冇份執法。唔記得出示紅牌其實可大可小，如果巴利費格遜入波，怕且佢可以提早退休。