睇奧運乒乓球男雙決賽，感情上希望香港贏，但理智上就知道中國會攞金牌。兩陣對圓之後，香港嘅李靜高禮澤看來信心不足，與中國嘅馬琳陳杞相比，活力不夠，畢竟馬陳二人年紀比較細，彈跳如老虎仔，香港高李兩位年紀較大，反應的確係慢半秒。去到奧運決賽呢個水平，差半秒就攞唔到金牌咯。不過攞到銀牌已經好唔容易，值得向佢兩位歡呼，為香港爭光。
高李兩位攞銀牌，原來益咗恒生銀行。眾所周知，恒生CEO鄭海泉鍾意打乒乓波，每星期都打，搵唔到拍乸就去對住一個發球機練接球、抽擊，唔使下下去執波，連續抽擊百幾二百次，出一身大汗，執波，從頭嚟過，佢每朝到馬會游水，每星期打波，故此唔見有肚腩。
恒生老早講好，邊位攞到奧運乒乓獎牌，就派獎金，亞軍銀牌有一百二十萬元，當然係由高李兩位均分啦，呢兩位領獎金之時，實會得到熱烈報道，恒生大收宣傳之效。所以話做公關咯喎，恒生的確可以做師傅；亦可講話行運，贊助費用得咁有效，唔到你唔服。
恒生平時捐助資助金，推廣乒乓運動，○四至○六年為此撥款三百七十萬元，可算大手筆。一位DGS會考畢業生于國詩，情願唔回原校升讀中六，決定全身投入乒乓，希望與外援（即大陸來港嘅國家級B隊球員如高禮澤、李靜）爭一日長短，參加北京奧運，真係志氣可嘉。香港乒乓球總會會長余潤興係超級大馬主，余家家人擁有嘅良駒如香港神駒、凱明神駒、勇捷神駒等等，匹匹入貨價超過四五百萬；副會長梁適華係珠寶界行尊，亦係老牌馬主，贏過打吡（大成功）。香港乒乓有余、梁、恒生等大水喉射住，唔怪得成績會好啲。