美國《新聞周刊》破天荒將我哋阿董列為封面人物，重尊稱佢為民主之父，大力推崇話係全靠佢，七年來搞到香港咁，令到港人民主訴求高漲，因此對香港人有功。
雖然做到《時代周刊》、《新聞周刊》嘅封面人物，未必係善男信女，例如拉登同埋鄧小平，之不過有美國佬睇起，始終係一種榮耀。陳方安生俾美國刊物抬捧過多次，好多土共嫉妒眼紅，今次唔使發火，輪到阿董威番一次，重做埋封面，可見人哋西方傳媒都幾客觀公正。
阿董又確係香港民主之父。喺兩任特首期間，爆發過五十萬人大遊行共兩次之多，二十三條立法又難產，特別係大力刺激港人要求○七、○八普選嘅意願，香港人日益醒覺，前途應該揸正喺自己手，冇咗呢七年來由禽流感至沙士一課課嘅政府教育，香港人會繼續安於做殖民地時代嘅順民。
講到民主，選舉戰愈來愈血腥，老左土共經已陷入不擇手段嘅精神狀態，為阻撓民主派過半數，唔理好醜，抹黑絕不留手，一係無中生有，一係小題大做，但求全線打沉民主派，有啲時候連自己人嘅詩姑亦睇唔過眼，制止土共將何偉途事件推到極端，聲稱何偉途仍有資格參選，可見呢一類所謂醜聞，充滿泡沫水份。
現時又輪到涂謹申遭到狂插，總之就捕風捉影兼無限上綱，搞到唔知係真定假。
不過咁亦好，呢次係挑戰香港人理性嘅歷史時機，係真定假，選民自己判斷，喺咁嘅妖異氣氛之中，左諗右諗亦無謂，總之就唔理好醜，一於用選票將啲港奸掃走。
若然今年九月十二日立法會投票率超高，咁就真係要多謝民主之父，冇咗佢吹暗雞，你話人人點會咁同仇敵愾呀？
傳真︰2623-9278
電郵︰