爭取自由民主，唔一定要遊行同嗌口號，大家開開心心唱吓歌都得。民主發展網絡喺今個月二十九號，喺遮打道行人專用區搞一個「8.29自由夢音樂會2004」，實行一路唱歌，一路宣揚自由民主信息。個音樂會由毛孟靜同林旭華做主持，重請咗梁文道、陳日君、司徒華、蔡子強同埋林子揚做嘉賓，到時佢哋重會上台為大家獻唱㖭。
主辦單位話，為咗令觀眾喺音樂會更投入，特別揀咗一啲香港人熟悉嘅歌曲，譬如《海闊天空》、《紅日》、《強》等等。有人話呢個音樂會係為泛民主派拉票嘅造勢大會，民網主席朱耀明就回應話音樂會的確係想動員市民去投票，但係到時唔會請任何候選人出席，所以唔係造勢大會。
（圖）朱耀明（右三）帶住梁文道（右）同林旭華（左三）等人預演一曲《WeShallOvercome》熱身。
傳真︰2623-9278
電郵︰