雖然二十二歲嘅姬絲頓丹絲（KirstenDunst）憑住《蜘蛛俠》系列上位，不過好多人都知佢細細個就開始拍廣告賺錢，佢未夠十二歲已經拍咗成一百個廣告，近排重有人搵番佢三歲時拍嘅麥片廣告出嚟，當時姬絲頓真係好趣致。
而姬絲頓繼《蜘蛛俠2》後嘅最新作品，就係下個月上映嘅《Wimbledon》（暫譯：溫布頓）。顧名思義，呢部電影係講述網球壇四大滿貫賽事之一嘅溫布頓草地網球賽，姬絲頓喺戲入面扮演一個火速冒起嘅網球新星，佢重會同保羅伯特尼（PaulBettany）所飾演嘅網壇老將發展一段微妙感情。
講開三十三歲嘅保羅，佢喺《有你終生美麗》同《軍天勇將：戰海豪情》入面做羅素卻爾（RussellCrowe）嘅老友，不過今次終於可以孭飛，而且重係做一個世界排名跌至一百五十七位嘅老將，希望喺溫布頓作最後一擊，相信保羅將會有唔少發揮機會。
除此之外，電影公司重會搵嚟溫布頓男子單打冠軍名將麥根萊（JohnMcEnroe）粉墨登場，可謂相當有真實感。
另外，同姬絲頓合作拍攝新片嘅奧蘭多布魯（OrlandoBloom），最近俾女友姬蒂保絲禾夫（KateBosworth）警告佢唔好再經常同姬絲頓一齊，否則會影響兩人嘅感情喎。