經濟發展及勞工局局長葉澍堃噚日同記者茶敍，局長首先澄清凡是對香港有利嘅嘢，佢都會做，好似開放航權，由○二年至今，已經同十個國家簽咗協議，即將會同約旦同沙地阿拉伯等中東國家簽字，總之簽得就簽咗先。八方問佢同中東打交道，唔怕恐怖分子咩？局長起先說漏了嘴話梗係怕，之後馬上補鑊話唔怕，重話要學何志平咁講，危險都要去。
另外，好似起郵輪碼頭，局長亦話唔一定限於東南九龍，政府第四季度就會公開邀請啲財團提建議，如果又有地、又唔使填海，又冇污染，又搞掂城規，咁就快啦，姓李、姓郭、姓乜都唔重要。
講到旅遊，佢話香港新景點肯定多過「三個字嗰個國家」（應該係新加坡），迪士尼明年底又會開，一定哄動，局長既然咁有信心，八方只有信佢啦。
傳真︰2623-9278
電郵︰