民主派議員喺7.1之後形勢大好，對手當然要出招打擊，搞到你冇啖好食，五個選區有兩個已中招。不過民主黨又的確唔生性，俾人捉住痛腳。當然對手做得咁明顯，啲選民唔蠢，到時一定識得點投。
重有，呢個世界有一樣嘢，叫做物極必反，八方早前同鄭大班傾開，佢話要再睇多一陣，假如重陸續有來，就唔排除號召今次參選嘅民主派人士全部站出來，搞個「反抹黑大遊行」，實行全面反擊。
白鴿黨前主席馬丁就以平常心看待呢件事，反正民主派在明，對手在暗，要防亦防無可防，一於當佢死嘅，繼續拉票。八方看來，惟今之計，「相信自己，相信選民」都不失為中上之策嘞。
又阿叻噚日幫周梁拉票，無端端叫出一句「如果住喺九東，就一定會投陳婉嫻唔投大班」，大班梗係話之佢，但係嫻姐真係唔知好嬲定好笑，因為咁已經可以計入佢選舉經費，阿叻若事前冇嫻姐批准就幫拖，亦分分鐘犯規。
傳真︰2623-9278
電郵︰