港股昨日升勢持續，資金不斷流入吸貨，以追捧地產股為主，新地（016）升2.1%，收72.75元，成交接近10億元，相當罕見。滙控（005）買盤不弱，但沽盤亦不少，股價升1元，收120.50元，成交近33.8億元。恒指全日收報12793，升146點，成交211.21億元。大市成交急增，港交所（388）即時大反彈，升7.5%至17.15元，成交高達4億元。
大市升至12800關口後出現阻力，Cookie話，大市之前在12800水平累積唔少蟹貨，消化需時，但若成交持續有200億元以上，相信破關並不難，現在香港經濟及樓市幾乎確認轉勢向上，難道股市會背馳下滑？
現時最重要係市場似乎已有共識，認為油價唔可以高企好耐，花旗甚至估計油價可能出現硬着陸，跌至27-30美元方有支持，國泰（293）周二勁升4%，反映市場預期油價將回軟。
長城汽車（2333）宣布04年款迪爾系列輕型貨車降價10%促銷，新一輪汽車減價戰似乎在所難免，不過汽車股依然企硬，長汽升2.19%至7元；駿威（203）及華晨（1114）冇起跌。黑客話，汽車股股價企硬，是因為早前芬佬已減持得七七八八，現時手持唔少現金，正等待低吸。中國汽車市場龐大，屬於高增長市場，外資熱錢不會一去不回，問題只是在哪個價錢買入而已。
電動工具商創科（669）獲美國大型基金威靈頓增持，由4.99%增至5.18%。聽講呢個基金來頭唔少，手上管理資產逾5440億美元，較蓋茨基金勁得多。
阿虎