大市連續兩日大升，小初實在唔知係因為期指同衍生工具帶動，抑或真係芬佬勁睇好本港股市，總之大市氣氛轉好，但目前買盤以大藍籌同地產股為主，雖然有個別二三線股異動，但未成氣候。
曾經被芬佬追捧過的勝獅貨櫃（716），前日公布中期業績靚仔，即刻有大行出報告強力推介，大概係話估唔到勝獅中期盈利咁好，市場對貨櫃需求仍然強勁，加上勝獅貨櫃生產力又提高咗，預計下半年盈利增長仍然好掂。
勝獅日前公布截至今年6月底止中期業績，盈利1048.5萬美元，比舊年同期上升49%，中期股息派4港仙。
經紀黃話，聽講出報告唱好勝獅間行身體力行坐咗唔少貨，如果唔係睇好隻股票，都唔會坐咁多貨。勝獅噚日升2.03％，收3.775元，成交股數426.6萬股，金額1604萬元。
另外，做建築的德信集團（313），噚日突然炒高23.5％，收6.3仙，成交股數1852萬股，金額107.28萬元。經紀陳話，早排傳過德信可能賣盤，股價異動或者反映單嘢就快搞掂。
慕容小初