經濟復甦，通脹重臨，利好樓市消息湧現，新盤市場又回復熱鬧。
除咗港島嘉亨灣外，近排荃灣以至青山公路沿線同東涌一帶，新盤排住隊開賣，淨係今日，已經有四個新盤，齊齊開記招，搶奪市場焦點。
長江實業近排不停催谷嘅東涌悅濤軒，今日就有按揭優惠公布。香港興業都唔輸蝕，同區嘅藍天海岸，今日正式開放全新第二座六個示範單位畀傳媒睇，跟悅濤軒齊齊爭見報率。唔單止東涌兩盤，新鴻基地產喺荃灣嘅服務式住宅爵悅庭，今日首次向傳媒介紹物業資料，準備展開軟銷。九龍倉嘅深井碧堤半島二期，就密鑼緊鼓開賣。
四個新盤有成五千幾個單位供應，新盤市場忽然熱鬧。
年輕人對好多嘢都感到不滿，突破機構主辦「天使微笑——創意巡遊籌款嘉年華」，向佢哋灌輸關懷、接納、彼此欣賞同扶持等正面訊息，傳播感恩文化。
呢個活動獲得新地全力支持，除咗捐錢，又借出沙田新城市廣場做活動場地，重派出三十幾名義工，提供協助。活動總共吸引到幾百個青少年參加，穿着自己做嘅天使服裝巡遊，同向生命天使寫低感恩留言。
內地樓盤發展商好多都有拎盤嚟香港賣，世茂就賣得夠晒氣派，一次過攞六個盤落嚟，重要喺五星級酒店搞展銷，代理中原（中國）許大偉話，上個禮拜六同日，雖然天氣唔好，但仍有兩千人到場參觀，反應好好，賣出單位總值逾三億人民幣。
買家以投資客為主，佔六七成，買入嘅單位，以上海世茂濱江花園回報最高，有十一二厘。其他樓盤有上海世茂佘山莊園、福州世茂外灘花園、南京世茂濱江新城、北京世茂奧林花園，同哈爾濱世茂濱江新城，各地都有盤，買家唔怕冇得揀。
美聯「萬馬奔騰」廣告出街後，利嘉閣又整咗個類似廣告，美聯告將官裏。美聯話，因對方冇抗辯，即係佢哋勝訴，共收五萬蚊賠償，同佢哋要求嘅一樣。𠵱家同利嘉閣傾緊律師費同有關費用賠償。
美聯利用筆賠償，舉辦「版權條例大搜查」講座，噚日舉行，等公眾清楚認識知識產權重要性，講座重列舉侵犯版權個案，加深出席者認識。
今年樓市交投暢旺，連公屋都多咗轉手，利記報告，截至八月二十三日，有八十五宗公屋買賣登記，其中八十宗獲利，銀碼最高嘅係黃大仙鳳德邨兩個單位，同以逾百萬易手，獲利逾三倍，係各公屋之冠。
不過，原來喺咁多登記中，竟然有兩單係蝕讓成交，雖然所佔比例唔高，但因為公屋住戶當初嘅買入價錢唔高，咁都肯蝕賣就令人奇怪。
蘭西
電郵地址：
