曾經為《宋家皇朝》配樂嘅日本音樂大師喜多郎，下個月十二號將會喺香港會議展覽中心舉行音樂會，大會更破天荒增設貴賓按摩椅座位，等觀眾一路按摩、一路好舒服咁享受音樂。噚日喜多郎接受馮仁昭越洋電話訪問嗰陣時話，今次嚟香港，除咗會拜祭亡友黃家駒外，亦會做啲好特別嘅嘢，悼念曾經主唱過佢作品《似水流年》嘅梅艷芳。
身處東京嘅喜多郎話：「我得悉Anita（梅艷芳）逝世嘅消息後，個人好低落，但因為當時喺美國，唔能夠出席佢嘅喪禮。今次嚟香港，我會為佢做一啲好特別嘅嘢，但暫時重未可以講出嚟，係一個秘密。」
雖然喜多郎表示好鍾意喺美國郊區嘅半隱居生活，但就話好討厭美國總統布殊，佢話：「布殊引起戰爭，而我係和平支持者，若果嚟香港有時間嘅話，我會到戲院睇《華氏911》。」強調好掛住香港嘅喜多郎，重話會着眼搞好音樂會嘅燈光，配合大會安排嘅貴賓按摩椅座位，等觀眾舒適地享受音樂。
李克勤噚日接受商台電話訪問，講到近期李麗珍同髮型師JackyMa嘅醜聞，咁啱克勤嘅髮型師就係Jacky，但係佢話：「人哋私人嘢還私人嘢，工作還工作，工作上我又唔覺得有乜問題。」問到曾經主持過世界盃嘅克勤，對今次奧運藝人主持被批評唔夠專業有乜睇法，克勤就認真識做咁話：「坦白講佢第一日係有唔熟」
許志安日前接受港台節目訪問，大談佢喺主持奧運節目時面對嘅批評，佢話：「對於啲批評我係開心嘅，我從來冇擔心過，我哋有檢討，亦都去改善，到𠵱家上咗軌道有進步，雖然咁多批評，但係我接受，接得呢個工作就要盡力。」安仔重話見到運動員喺比賽嗰陣時失敗，亦令佢有所得着，對事情嘅睇法亦都闊咗，重話自己唔夠積極咁話。
宣萱同王傑噚日喺中環蘭桂坊拍攝無綫新劇《老婆大人》嘅外景，宣萱早前開工嗰陣唔小心弄傷手，噚日亦清楚見到瘀痕，佢話：「我唔止隻手受傷，其實連個屁股都瘀晒，通常發生意外嗰陣時，都會好自然咁用雙手保護塊面，女仔梗係貪靚啲㗎啦。」
名模陳嘉容身形高䠷，原來都有外形嘅煩惱。佢噚日喺尖沙嘴出席一個美容器材活動時，就話自己天生骨架大，瘦極都有限，最希望可以減吓手臂位㖭。佢又透露計劃寫第二本書，佢話：「我準備生第二個仔，今次係寫形象、造型為主嘅書，十一月會一個人去布吉閉關寫稿。」
