鄉議局今年嘅形勢大好，副主席林偉強已經自動當選，主席劉皇發好大機會喺區議會成功搶灘，另一副主席張學明有望掹譚耀宗衫尾，循直選入埋立法會，議席有望增加三倍，喺立法會嘅影響力大增。
發叔高興之餘，都應該好好清理一吓門戶。八方不時旁聽鄉議局開會，但有啲委員嘅言行唔多檢點，成日對啲女行家口花花，甚至有性騷擾之嫌，搞到啲女行家唔多高興，唔知會唔會集體向發叔上書。
其中一個委員開開吓會，突然問某個大學畢業無耐嘅女行家：「有冇男朋友？」個女行家都算好脾氣無發嬲，但呢個委員重唔識死，問埋佢啲同學有冇男朋友？然後叫個女行家，介紹啲無男朋友嘅同學畀佢識，因為佢夠成熟穩重，啱晒啲妹妹仔！
八方又聽聞，唔少女行家都俾呢個人撩過，特別係第一次嚟鄉議局採訪嘅，佢就非常關心佢嘅工作情況，甚至叫個女行家，如果有報道出街記住叫佢睇，認真飛禽大咬。
傳真︰2623-9278
電郵︰