港股噚日晏晝突然抽上，地產股尤其氣勢如虹，唔少股份一支箭咁升上去，真係追貨都追到氣咳。經紀黃話，睇嚟好多炒家都未平淡倉，短期應該重有一轉炒上。
至於細價股方面，雖然大部份繼續冇運行，但小初發現好耐冇郁過嘅國中控股（202），連續兩日股價都見異動，噚日再升9.76%，收0.18元，成交股數4359萬股，金額764萬元。
經紀陳話，國中突然炒上，買賣盤熟口熟面，似乎係自己人居多，最怕係炒到㷫烚烚之時，突然玩抽水。
國中早幾個月前，曾經喺大陸有唔少傳聞，導致股價沉寂多時，但呢排國中又高調番好多，出街搭巴士都見到佢哋喺長沙嘅樓盤廣告，但賣樓會令股價上升？睇嚟都係藉口居多。
經紀陳又話，佢估計國中要抽水唔係無的放矢，皆因公司上個月公布業績由盈轉虧，兼夾披露未償還借貸比起舊年多咗好多，而1年內要償還的貸款，有成3.5億銀，如果能夠喺資本市場上抽到水，自然最好。
慕容小初