大市噚日嘅發展夠晒戲劇性，上晝重係「死咕咕」，恒指在窄幅爭持，且跌過20多點，但下晝氣氛完全唔同晒，大戶瘋狂掃貨，一路掃到收市，結果大升214點，報12646；期指升勢重急，升249點，高水37點。
前日先講過，大戶呢兩個月嘅收集快完成，單邊升市隨時會出現，快則本周，慢則遲多兩三個禮拜。話口未完，果然噚日就大升，衝破12500阻力，且有大成交近150億元配合，中期升浪確認，短期目標13200，中線可重上14000水平。
長和系繼續做火車頭，長實（001）大升2.25元，和黃（013）亦升0.75元；兩隻長實輪愈升愈急，9973高收0.56元，再升31.7%，9389衝上0.98元，亦進帳24%。賺咁多，心足就回吐可也。
滙控（005）「牛」咗咁耐，下一個大升浪應該輪到佢，噚日已高收119.5元，升1.5元，大成交而突破複式頭肩底的頸線阻力，上升目標指向130元。對滙控升勢有信心，賺快錢，買認購輪可也，推介9772，有機會賺一個開。
遠東發展（035）高收1.67元，升6仙，長達5個月的複式頭肩底，終於出現突破，照度上去，中線目標指向2.45元。現年度（3月年結），估計售樓同酒店業盈利3.5億元，加上出售旺角物業賺2.8億元，合共6.3億元，每股盈利0.53元，就算升到目標價2.45元，PE都只係4.6倍！
樓市再現生機，地產股已率先彈出，美聯物業（1200）高收2.275元，升0.125元，成交更大增到830萬股，衝破長達4個月的降軌阻力，技術指標向好，顯示大型收集已完成，上升目標指向3元水平。
經歷漫長的68個月，本港終於走出通縮，由於預期物價將上升，物業需求亦會向上，整體樓市交投將會穩步上揚，美聯已調高今年二手成交量至7萬宗，較去年大增52%。
美聯03年（12月年結）獲利1.22億元，今年佣金大增，保守估計盈利可上升至2億元，每股盈利0.284元，PE只係8倍。要知道，住宅樓宇求過於供情況在06年會到最高峯，美聯前景會好樂觀。
郭兆誠