關之琳昨日親口承認腦部腦下垂體生了一個腫瘤，現時要靠藥物抑制腫瘤長大，否則視覺神經會受影響。關之琳表示醫生建議她可做腦部手術，不過因為她腦內的腫瘤現時沒再變大，故暫時沒有動手術的需要。
近日有傳現年四十一歲的關之琳腦部腦下垂體長了一個腫瘤，約有一毫米大。昨日關之琳透過電話直認腦部生了腫瘤，據知她是因為經常有偏頭痛的症狀出現，經醫生檢查下，證實是腦部生瘤，不過暫時沒有生命危險。
定期覆診做檢查
身在上海的關之琳昨日透過助手阿珍向本報大方承認患病一事，她說：「其實醫生同我講，腦部呢個瘤已經存在咗十幾年，位置喺腦下垂度，我一直有食藥，進展都好好，冇生命危險。醫生亦話如果我驚嘅話，可以做腦科切除手術，但呢個瘤一直都冇再長大，所以唔需要做手術，因為個瘤咁耐都冇長大過，有時我幾乎已經唔記得自己腦部有生瘤呢回事。」
有指服食藥物控制腦瘤，可能會令患者出現副作用如水腫等，對此關之琳表示自己並沒有出現水腫，她說：「我食藥期間並冇出現水腫，亦冇其他情況發生，其實我𠵱家已經停咗一段時間冇食藥，不過有定期做檢查。」
或出現失明危機
其實圈中一直傳聞中國星老闆娘向華強太太陳嵐亦患有腦腫瘤，她昨日接受本報電話訪問時亦承認此事。向太說：「我喺好耐之前已經發現，一直要食藥控制個瘤唔好再長大。其實食藥就可以抑制腫瘤長大，我個瘤亦可以控制到，所以醫生話暫時唔需要做手術，不過我食藥之後就有副作用，身體出現水腫嘅情況。」
向太又謂醫生指若腫瘤繼續長大的話，就會影響到她的視覺神經，令視力受影響，並可能出現失明危機。據知關之琳多年亦一直靠食藥抑制腦腫瘤生長，並經常要做檢查，以觀察腫瘤的情況。
動手術存在風險
著名腦科醫生黃震遐昨日接受本報電話訪問時說：「呢啲一毫米嘅腫瘤係叫做微型腫瘤，一般情況嚟講係唔會再變大，只係會引起內分泌變化，通常用藥物可以治療到。」
問到病人是否需要動手術將腫瘤切除時，黃醫生說：「因為腫瘤太細，患者唔會有乜嘢特別感覺，如果病人冇其他症狀係同個腫瘤有關嘅，一般嚟講係唔需要將腫瘤切除。如果病人連內分泌變化都冇，咁就只需要觀察就可以，因為手術始終有風險喺度。」
採訪：陳月媚
