劉德華同鄭秀文（Sammi）呢對老拍檔合作演出嘅電影《龍鳳鬥》本來下個月上映，但為咗唔使直接同王家衛執導嘅《2046》對撼，所以改咗喺十月先上映。導演杜琪峰早排又為《龍》片補戲，可想而知佢哋對呢部戲嘅票房幾咁緊張！
喺套戲入面華仔同Sammi都係大賊，有場講佢哋一齊去紅酒舖偷價值連城嘅紅酒，Sammi專揀迷你裝，但華仔就專向大大支嘅紅酒下手。
其實喺現實生活上，除咗杜琪峰鍾意飲紅酒，Sammi同華仔基本上對紅酒冇乜認識，華仔話：「平時我喺公眾場合做祝酒儀式，我都會吩咐工作人員用綠茶代替香檳。」
Sammi就話：「以前我都會同朋友飲紅酒，每次學朋友咁搖酒杯，我都會將紅酒倒瀉喺地下，搞到好尷尬。」以馮仁昭所知，其實𠵱家娛樂圈好流行飲紅酒，但真係識飲嘅人就唔係咁多！
美國女歌手AliciaKeys將會喺十月三日首次嚟香港，喺灣仔會展舉行演唱會，門票嘅價錢分別由三百八十八至七百八十八蚊不等。而Alicia嘅亞洲巡迴演唱首站，下個月二十五日會喺北京萬里長城舉行。難得Alicia嚟香港，佢嘅fans千萬唔會錯過啦！
林保怡主演嘅無綫古裝劇《金枝慾孽》啱啱出街，但佢噚日接受電台訪問時竟然話對呢套劇嘅期望唔係好大，林保怡話：「我成日都有一句，就係唔好期望過高，雖然我做到最好，但𠵱家嘅收視好難講，始終要睇定啲。」問同劇嘅花旦會唔會搶戲時，佢就話：「我就唔覺得有，但係佢哋就鬥戲，因為要求高，所以成日NG。」
羅家英前晚喺尖沙嘴出席粵曲籌款活動時，大大聲話自己會返內地拍三個月劇，重話汪阿姐好放心佢，所以唔會探班，重准佢出去揼骨㖭！不過家英哥話會影多啲數碼相電郵報到，佢話：「有相士話我係『紅豔煞入命』，一生會有好多女友，不過阿姐話我六十幾歲，都唔使再驚喎。」梗係啦，有乜行差踏錯，家英哥唔怕阿姐扭耳仔咩！
黎姿同吳啟華前晚喺清水灣拍攝劇集《妙手仁心III》，兩個人喺度睇星星，鬼咁浪漫。黎姿話以前同男友拍拖試過一齊觀星，但草叢入面突然有個頭伸咗出嚟，嚇到佢驚惶大叫，黎姿話：「當時唔知係人定係鬼，嚇到我即刻走，都好失儀㗎，自此之後都冇同男友去觀星。」馮仁昭聽落都覺得幾恐怖喎！
