為咗紀念國家改革開放總設計師鄧小平嘅百周年冥壽，恒豐金業科技集團鑄造咗一尊「鄧小平金至尊美鑽金像」，諗住喺後日中午君悅酒店舉行嘅一個午餐會度，送畀嚟香港嘅鄧小平女兒鄧林、鄧楠同鄧榕，作為代表香港市民對鄧小平嘅敬意同懷念。
講到呢個金像，認真巴閉。佢高五十厘米，用咗二點八公斤純金同埋五千粒總重一百卡嘅鑽石鑄造，價值就超過一百萬港元。而佢嘅鑄造過程更加係參考咗五十幾幅鄧小平生平嘅歷史圖片，重係首次採用將平面圖片立體化嘅電腦技術，最後設計圖要交畀中央宣傳部嚴格審批通過。之後鑄出嚟嘅金像重要做打磨，前後足足做咗近三個月，動用咗三十幾人。
恒豐金業主席林世榮噚日話喎，呢尊金像選用一百卡鑽石，係象徵鄧小平嘅百周年冥壽，而佢嘅偉大功績亦都好似鑽石同黃金咁，永垂不朽同永不褪色。又真係幾有心思喎。
（圖）恒豐金業主席林世榮噚日話鑄造呢尊「鄧小平金至尊美鑽金像」，係要代表港人表達對鄧小平嘅敬意。
馬泉崇攝
傳真︰2623-9278
電郵︰