保良局呢啲慈善團體每年換屆都會請新聞處處長蔡瑩璧同傳媒聚餐，八方噚日都有去湊熱鬧，保良局新主席陳亨利喺致詞時透露，佢哋想擴展服務到內地，好似為港人子女辦學，唔使啲小朋友舟車勞頓要每日過境返香港讀書。不過，萬事都有待商量，重未成事。
近年香港經濟唔好，首當其衝嘅梗係籌款活動，八方問保良局有幾大影響，佢位籌募經理話，最慘係連賣旗籌款都抽唔中，今年真係損失慘重，因為往年大大話話都可以籌到百幾二百萬幫補吓開支。
咁原來唔止保良局冇旗賣，連東華三院都抽唔中，冇得賣。政府解釋，就係太多人申請賣旗，所以抽籤決定，如此一來，大慈善機構同細機構一視同仁，抽唔到都冇謂喊，只好希望其他途徑可籌多啲補番。
（圖）保良局新任主席陳亨利將紀念郵票送畀蔡瑩璧處長。
傳真︰2623-9278
電郵︰