方力申前晚出席商台活動時不但被女fans熊抱，主持人Donald更大爆方力申「何B仔」很大，嚇窒日本猛男，是中國人的驕傲。
方力申前晚在九龍灣出席商台「903萬人迷大作戰」，主持ILoveUBoyz成員之一的Donald大爆跟方力申在日本浸溫泉時，發覺他的「何B仔」很大，Donald說：「我發覺佢好勁，浸溫泉嗰陣，啲日本男人見到佢亦自愧不如，惟有遮住下體走開，佢真係中國人嘅驕傲。」不過方力申就謙稱自己只是亞洲人身材，他說：「邊有人會留意呢啲嘢，唔係嘅話浸溫泉咪好唔得閒。」
方力申在跟歌迷親密接觸環節中，一位女歌迷十分主動，對方力申又攬又錫，動作「猴擒」，台下歌迷見狀後十分抗拒，大聲抗議，當該名女歌迷欲親吻方力申時，方力申顯得有點迴避，最後只讓該女歌迷吻他的臉頰。
事後方力申說：「我覺得嗰個歌迷都係熱情啫，我避唔係嫌棄，係自然反應，我只會畀鍾意嘅人迎接我嘅吻。」對於台下歌迷表現不滿，他說：「佢哋咁樣好冇禮貌，呢啲係人身攻擊，我會教吓佢哋。」而在真情剖白環節中，方力申聽到歌迷的心聲時，更感動得流下熱淚。
對於被指跟葉璇合作主持奧運節目時鬧不和，方力申說：「我都唔知我有講過『寸』字，後嚟睇番錄影帶先知有講過，我哋真係冇嗌交，好男不與女鬥，男人點會同女人鬧交，如果佢寸我，我唔會即刻寸番佢，而係會走去篤佢背脊，即係同監製講嘢，不過當然冇咁嘅事，我同葉璇合作得好好。」
此外，方力申昨日在銅鑼灣出席滅罪宣傳活動，他獲知Steven的母親因壓力大而仰藥入院，方力申慨歎身為藝人的父母亦有一定壓力，希望對方積極面對人生。
採訪、攝影：駱華齡、卓寶花
