港股破悶局，恒指升214點，交投由92億元增至149億元。恒指收12646，升破6月份同本月初高位。油價個勢向下，港股個勢向上，長和系帶動大市之後，輪到滙控（005）。滙控8月2日派中期成績表後，翌日裂口性開出，見119元，之後3個星期反反覆覆，昨日一舉破位，收119.50元，升1.50元。
滙控C輪：滙控打破長方形走勢，隨時短期內升多三幾蚊，滙控C輪好多都有較高槓桿率，爆炸力（同殺傷力）都好勁。
短炒滙控C輪，向9772埋手，成交由17球大增至65球，幡竿豎起晒。隻輪12月中夠鐘，輪價68仙，溢價只係1%，槓桿率17.6倍（有效12.5倍），引伸波幅只有14.7%。咁低嘅溢價，咁大嘅槓桿率，正股又有勢，符合晒短炒條件。
唔想睇實短期波動，買嚟擺，博長線釣大魚，則揀2155。輪價88仙，溢價1.1%，槓桿率13.6倍（有效9.1倍），引伸波幅亦只有15%。好似冇乜特別，咪住，隻輪明年4月先至到期，咁低溢價，時間值着晒數。揸長線，正股以上升至140元計，隻輪見2.8元，有兩倍幾回報。你估正股有冇機會見140元？唔少大行估佢嘅目標價就超過140元。
和黃C輪：長實（001）升3.5%，和黃（013）升1.3%，慢過長實，亦慢過太A（019）嘅3.8%。博和黃再跑快啲，買C輪，揀9811。
9811喺10月上旬夠鐘，輪價57仙，溢價只係0.7%，槓桿率則有10.6倍（有效8.3倍），引伸波幅32%。
章盛