民主黨九龍東候選人何偉途，喺東莞以所謂叫雞罪名不幸蒙難，遭到中方無理勞改六個月。點知今次律政司司長梁愛詩，終於叻女番一次，發揮獨立思考，講理性，唔講愛國感性，毅然宣布，偉哥只不過喺大陸被判勞改，並未構成選舉條例所規限嘅「監禁」，因此可以保留參選資格，九月十二日實行缺席參選。
詩姑咁嘅裁決，即是間接宣布何偉途無罪。梗係喇，就算退一萬步，偉哥真係有叫到雞，無論一國又好，兩制又好，都冇理由判六個月咁重。偉哥缺席參選，一經詩姑品題，今次理直氣壯，重分分鐘得到九龍東區嘅夜生活從業員選民瞓身支持，大家同仇敵愾，可能今屆票王反而係何偉途，而唔係大班。
不過跟住又發生一個技術性嘅問題。冇錯，以前婚嫁，搵隻公雞拜堂，新娘一樣可以過門，今次立法會選舉，九龍東少咗一個，擺一張空櫈，照樣選番何偉途，不過九月十二之後，當選議員要齊齊宣誓，到時何偉途唔通遠在東莞勞改場，飛鴿傳書出嚟，定係指定由大班（因為佢一定高票當選）代宣？
所以惟今之計，詩姑同董伯，不如趁住夕陽無限好，同自己歷史留名，齊齊向中方提出嚴正三點交涉：
一、何偉途係香港合法公民，照香港司法標準，並無犯下任何罪行。
二、就算真係有叫雞，促進珠三角經貿大融合，不但無罪，重係有功。
三、既然有功，咁公安就應該同佢一齊慶功，提前釋放，並賠償一切損失，畀佢返港參選立法會，成為中華人民共和國香港特別行政區立法會議員，更好地支持董建華施政。
若然董詩兩人做到交涉以上三點，換取何偉途人身自由，全港嘅夜生活從業員、貨櫃車司機、的士司機，都會齊齊歡呼，不但慶祝偉哥脫險歸來，重慶賀埋董詩兩人終於開悟，獲得新生㖭。
（圖）何偉途雖然喺國內被判勞教，不過仍然保留到參選立會嘅資格。
傳真︰2623-9278
電郵︰