前日係偉大嘅一國兩制發明者鄧小平百歲冥壽，但香港政府就唔嗅米氣，幫鄧伯伯倒米，竟然喺當日發表聲明，反駁新加坡內閣資政李光耀話新加坡比香港優勝嘅言論，話一國兩制係好嘢，「亞洲其他經濟體系並沒有條件佔有同等地位」。
新加坡近來成日對偉大嘅祖國不敬，總理李顯龍接任前都冒大不韙走去台灣訪問，其實香港政府都係想借機會同李光耀講，你唔好咁寸，一國兩制呢件好嘢，新加坡恨都恨唔到，咁點解八方話港府咁講有問題？
大家唔好唔記得，一國兩制開始時唔係為香港，而係為台灣而設計，八方想問，「亞洲其他經濟體系」，包唔包括台灣先？重有已經回歸咗嘅澳門呢？除非港府強辯，話「亞洲其他經濟體系」唔包台灣，因為佢已經係中國不可分割嘅一部份，澳門亦算唔上係「經濟體系」，因為只有開賭一瓣。否則的話，港府咁即係揚言，包括台灣及澳門在內嘅「亞洲其他經濟體系」冇條件實施一國兩制，咁董生置國家統一大業於何地呢？
傳真︰2623-9278
電郵︰